Lok Sabha Election 2024 : महुआंच्या विरोधात राजमाता रिंगणात; भाजपला राजघराणे मिळवून देणार विजय?

West Bengal News : केंद्रीय तपास यंत्रणांच्या चौकशीच्या फेऱ्यात अडकलेल्या आणि संसदेत पैशांच्या बदल्यात प्रश्न या प्रकरणामुळे खासदारकी गमावलेल्या महुआ मोईत्रा यांच्या पराभवासाठी भाजपने कंबर कसली आहे. आगामी लोकसभा निवडणुकीत महुआ यांच्याविरोधात भाजपने बंगालमधील राजघराण्यातील राजमाता अमृता रॉय यांनाच मैदानात उतरवले आहे. त्यामुळे ही लढत अटीतटीची होईल, असा अंदाज वर्तवला जात आहे.

भाजपने काल 111 उमेदवारांची पाचवी यादी जाहीर केली आहे. या यादीमध्ये अमृता रॉय यांना उमेदवारी देण्यात आली आहे. बंगालमध्ये भाजपने 35 जागा मिळवण्याचे लक्ष्य ठेवले आहे. त्यासाठी काही विद्यमान खासदारांचा पत्ता कट करून नव्या चेहऱ्यांना संधी देण्यात आली आहे. काही जणांना आयत्यावेळी पक्षप्रवेश देत त्यांना तिकिटे देण्यात आली आहेत.

मागील निवडणुकीत महुआ मोईत्रा यांनी भाजपचे उमेदवार कल्याण चौबे यांचा 63 हजारांहून अधिक मतांनी पराभव केला होता. त्यांना तब्बल सहा लाखांहून अधिक मतं मिळाली होती. मात्र, या वेळी त्यांच्यासाठी ही लढत सोपी नसली, असे मानले जात आहे. संदेशखाली प्रकरण, तृणमूल काँग्रेसमधील नेते, मुख्यमंत्री ममता बॅनर्जी आणि सरकारवर झालेले भ्रष्टाचाराचे आरोप याचा परिणाम निवडणुकीत होऊ शकतो.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भाजपने अमृता रॉय यांना मैदानात उतरवत सगळ्यांचेच लक्ष वेधून घेतले आहे. या भागात त्या लोकप्रिय आहेत. त्या अठराव्या शतकातील राजा कृष्ण चंद्र देव यांच्या घराण्यातील आहेत. नदिया जिल्ह्यातील या राजघऱाण्याचे योगदान मोठे आहे. आजही लोकांमध्ये या घराण्याविषयी आदर आहे. त्याचा फायदा भाजपला निवडणुकीत होऊ शकतो, असे मानले जात आहे.

दिलीप घोष यांचा मतदारसंघ बदलला

बंगाल भाजपचे माजी प्रदेशाध्यक्ष व विद्यमान खासदार दिलीप घोष यांचा मतदारसंघ बदलण्यात आला आहे. त्यांना मेदिनीपूर ऐवी आता वर्धमान दुर्गापूर मतदारसंघातून उतरवण्यात आले आहे. तर आसनसोल मतदारसंघाच्या आमदार अग्निमित्रा पॉल मेदिनापूरमधून निवडणूक लढतील. टीएमसीतून नुकतेच भाजपमध्ये दाखल झालेल्या तापस रॉय यांना कोलकाता उत्तर मतदारसंघातून उमेदवारी देण्यात आली आहे.

R