मोदींच्या सुरक्षेतील निष्काळजीपणा अंगलट; पंजाब पोलिस महासंचालकाची बदली

चंदीगड : देशातील पाच राज्यांच्या विधानसभा निवडणूकांचे बिगूल वाजले आहे. मार्च 2022 मध्ये उत्तर प्रदेश (Uttar Pradesh), गोवा (Goa), मणिपूर (Manipur), उत्तराखंड (Uttarakhand) आणि पंजाब (Punjab) या पाच राज्यांच्या विधानसभेच्या निवडणुका होणार आहेत. पंजाब विधानसभा निवडणूकांच्या पार्श्वभुमीवर पंजाब सरकारने पंजाबचे डीजीपी सिद्धार्थ चट्टोपाध्याय (DGP Siddharth Chattopadhyay) यांना पंतप्रधान नरेंद्र मोदी (Narendra Modi) यांच्या सुरक्षेतील त्रुटींमुळे बदली केली आहे.

आता सिद्धार्थ चटोपाध्याय यांच्या जागी वीरेश कुमार भवरा (Veeresh Kumar Bhavra) यांची पंजाबचे नवे डीजीपी म्हणून नियुक्ती करण्यात आली आहे. पंजाब सरकारने भवरा यांची डीजीपी पदावर नियुक्ती करण्याआधीच शनिवारी निवडणूक आयोगाने निवडणुकीच्या तारखा जाहीर केल्या.

- कोण आहेत वीरेश कुमार भवरा (Veeresh Kumar Bhavra)

पंजाबचे नवे पोलीस महासंचालक व्ही. के. भावरा हे 1987च्या बॅचचे आयपीएस अधिकारी आहेत. सध्या डीजीपी होमगार्ड म्हणून तैनात आहेत. त्यांनी दक्षता प्रमुख म्हणूनही काम केले आहे. देशातील प्रसिद्ध पोलिस अधिकाऱ्यांमध्ये वीरेश भवरा यांची गणना होते.

मुख्यमंत्री चरणजीत चन्नी यांच्यावर पंतप्रधान मोदींच्या सुरक्षेतील त्रुटींनंतर चौफेर टीका होत होता. आगामी विधानसभा निवडणुकीत भाजपनेही त्यावर राजकारण सुरु केले. त्यामुळे चरणजीत सिंह सरकारला हा निर्णय घ्यावा लागला.

दरम्यान, यूपीएससीकडे पाठवण्यात आलेल्या पॅनेलमध्ये वीरेश भवरा यांचे नाव अव्वल ठरले आहे. 2017 च्या पंजाब विधानसभा निवडणुकीदरम्यान संपूर्ण राज्यात सुरक्षा व्यवस्थेसाठी निवडणूक आयोगाने त्यांची नोडल अधिकारी म्हणून नियुक्ती केली होती. यावेळी भावरा यांची डीजीपी म्हणून नियुक्ती करण्यात आली आहे.

विशेष म्हणजे, सीएम चन्नी यांनी पदभार स्वीकारल्यानंतर नवज्योतसिंग सिद्धू पंजाबमधील डीजीपीमुळे काहीसे नाराज होते आणि त्यांनी प्रदेशाध्यक्षपदाचा राजीनामाही दिला होता. मात्र काही काळानंतर त्यांनी तो परत घेतला.