Narendra Modi oath Ceremony update : मोदींच्या शपथविधीला बिबट्या? राष्ट्रपती भवनातील ‘त्या’ प्राण्याचा व्हिडिओ व्हायरल

New Delhi : राष्ट्रपती भवनात शनिवारी शपथविधी सोहळा दिमाखात पार पडला. यावेळी पंतप्रधान नरेंद्र मोदींसह 72 जणांनी मंत्रिपदाची शपथ घेतली. या शपथविधीची चर्चा जगभर सुरू असतानाच राष्ट्रपती भवनातील रहस्यमयी प्राण्याचा शपथविधीदरम्यानचा एक व्हिडिओ व्हायरल झाला आहे.

सोशल मीडियात व्हायरल होत असलेल्या या व्हिडिओमध्ये एक प्राणी राष्ट्रपती भवनात फिरताना स्पष्टपणे दिसत आहे. हा प्राणी बिबट्या असल्याची चर्चा सोशल मीडियात रंगली आहे. मात्र, याबाबत अद्याप केंद्रीय सुरक्षा यंत्रणा किंवा राष्ट्रपती भवन प्रशासनाकडून कोणताही खुलासा करण्यात आलेला नाही. त्यामुळे गुढ वाढत चालले आहे.

भाजपचे खासदार दुर्गादास उइके हे शपथ घेतल्यानंतर सह्या करून राष्ट्रपतींच्या दिशेने जात होते. याचवेळी राष्ट्रपती भवनातील कॉरिडॉरमध्ये एक प्राणी चालत असल्याचे व्हिडिओमध्ये दिसते. शपथविधी सोहळ्यासाठी देश-विदेशातील अनेक महत्वाचे नेते, उद्योगपती सेलिब्रिटी, इतर महत्वाचे मान्यवर हजर होते.

शपथविधी राष्ट्रपती भवन तसेच परिसरामध्ये कडेकोट बंदोबस्त होता. अशावेळी भवनामध्येच एक रहस्यमय प्राणी दिसून आल्याने चर्चांना उधाण आले आहे. सोशल मीडियात याबाबत तर्कवितर्क लढवले जात आहे. कुणी या प्राण्याला बिबट्या म्हणत आहे तर कुणी पाळीव मांजर किंवा कुत्रा. काहींनी राष्ट्रपती भवातील सुरक्षेचा मुद्दाही उपस्थित केला आहे.