Arvind Kejriwal : दिल्ली जिंकल्यानंतर केजरीवाल म्हणतात, आता पंतप्रधान अन् केंद्राचा आशीर्वाद हवा

Arvind Kejriwal News : आज दिल्ली महापालिकेच्या निवडणुकीचा निकाल लागला. त्यामध्ये 'आप'ने बहुमत मिळवलं. या विजयानंतर दिल्लीचे मुख्यमंत्री अरविंद केजरीवाल (Arvind Kejriwal) यांनी दिल्लीतील जनतेचे आभार मानले आहेत. तसेच 'आप'ने दिल्ली महापालिकेत मिळवलेल्या विजयानंतर आपच्या कार्यकर्त्यांनी जल्लोष केला आहे.

केजरीवाल म्हणाले, ''जनतेने याआधी जी जबाबदारी दिली त्यानंतर आम्ही शाळा, रुग्णालये, वीज समस्या आम्ही सर्व ठीक केलं. त्यानंतर आता दिल्लीकरांनी साफ-सफाई करण्याची व पार्क व्यवस्थित करण्याची जबाबदारी दिली आहे. त्यामुळे एवढा मोठा बदल घडवणाऱ्या विजयासाठी सर्वांचे अभिनंदन'', असं केजरीवाल म्हटले आहेत.

''आता जनतेने जबाबदारी दिली. त्यामुळे आपण सर्वांनी मिळून काम करायचं आहे. मी सर्व पक्षांच्या उमेदवारांना आवाहन करतो की, राजकारण आजपर्यंतच होतं. पण आता सर्वांनी मिळून दिल्ली व्यवस्थित करायची आहे. यासाठी भाजप (BJP) आणि काँग्रेसचे (Congress) सहकार्य हवे आहे. या बरोबरच केंद्र सरकारचेही सहकार्य हवे आहे, असं केजरीवाल म्हणाले.

ते पुढे म्हणाले, ''दिल्ली ठिक करण्यासाठी मला पंतप्रधान मोदी (Narendra Modi) आणि केंद्र सरकारचे आशीर्वाद हवे आहेत. तसेच २५० नगरसेवक विजयी झाले आहेत, ते कोणत्याही पक्षाचे नाहीत. ते दिल्लीतील नगरसेवक आहेत. आता आम्ही दोन कोटी लोकं मिळून दिल्ली स्वच्छ करू, तसेच दिल्लीच्या सरकारप्रमाणे महापालिकेतील भ्रष्टाचारही दूर करू, असंही ते म्हणाले.

''देशात सकारात्मक राजकारण वाढल्यावर देश देखील नंबर वन होईल. यामधून हेच सांगायचंय उद्धटपणा करू नका. काहींना असं वाटतं की अपशब्द वापरले तर मतं मिळतात. पण आम्हाला ते करण्याची गरज नाही. त्यामुळे नकारात्मक राजकारण करू नका'', असं म्हणत केजरीवालांनी विरोधकांना टोलाही लगावला. (Arvind Kejriwal News)