New Labour Law : नवीन लेबर कोड लागू! तुमच्या पगारापासून ते सुट्ट्यांपर्यंत सर्व काही बदलणार; जाणून घ्या तुमच्या खिशावर काय परिणाम होणार?

नवीन लेबर कोड लागू झाल्यानंतर देशातील नोकरदार वर्ग आणि कंपन्यांच्या कामकाजात मोठे बदल दिसणार आहेत. केंद्र सरकारने जुन्या कामदार कायद्यांना एकत्र करुन 4 नवीन लेबर कोड तयार केले आहेत. या बदलांचा थेट परिणाम पगार, पीएफ, ग्रॅच्युइटी, कामाचे तास आणि सुट्ट्यांवर होणार असल्याने कर्मचारी वर्गात मोठी चर्चा सुरु आहे.

नवीन नियमांनुसार कर्मचाऱ्यांचा बेसिक पगार हा एकूण CTC च्या किमान 50 टक्के असणे आवश्यक राहणार आहे. त्यामुळे पीएफ आणि ग्रॅच्युइटीसाठी होणारी रक्कम वाढेल. निवृत्तीनंतर कर्मचाऱ्यांना याचा मोठा फायदा मिळू शकतो. मात्र दुसरीकडे, पीएफ कपात वाढल्यामुळे अनेक कर्मचाऱ्यांच्या हातात येणारा मासिक पगार काही प्रमाणात कमी होण्याची शक्यता आहे.

नवीन लेबर कोडमध्ये फिक्स्ड टर्मवर काम करणाऱ्या कर्मचाऱ्यांनाही ग्रॅच्युइटीचा लाभ देण्याची तरतूद करण्यात आली आहे. याआधी दीर्घकाळ सेवा आवश्यक होती, मात्र आता कमी कालावधीतही हा फायदा मिळू शकतो. त्यामुळे खासगी क्षेत्रातील कर्मचाऱ्यांना अधिक आर्थिक सुरक्षितता मिळण्याची अपेक्षा आहे.

कामाच्या तासांबाबतही महत्त्वाचे बदल करण्यात आले आहेत. आठवड्यातील कमाल कामाचे तास 48 ठेवण्यात आले आहेत. कंपन्यांना हवे असल्यास 4 दिवस 12-12 तास काम घेण्याची मुभा असेल. त्याबदल्यात कर्मचाऱ्यांना अधिक सुट्ट्या द्याव्या लागतील. अतिरिक्त वेळ काम घेतल्यास ओव्हरटाइमचा वेगळा मोबदला देणे बंधनकारक राहणार आहे.

महिलांसाठीही या नियमांमध्ये मोठा बदल करण्यात आला आहे. महिलांना सर्व शिफ्टमध्ये काम करण्याची परवानगी देण्यावर भर देण्यात आला आहे. मात्र त्यासाठी कंपन्यांनी सुरक्षा आणि आवश्यक सुविधा उपलब्ध करून देणे आवश्यक असेल. त्यामुळे महिलांसाठी रोजगाराच्या नव्या संधी निर्माण होऊ शकतात.

फूड डिलिव्हरी, कॅब सेवा आणि ऑनलाइन प्लॅटफॉर्मवर काम करणाऱ्या गिग वर्कर्सनाही नवीन सोशल सिक्युरिटी कोडचा फायदा मिळू शकतो. विमा आणि सामाजिक सुरक्षेच्या सुविधा त्यांच्यापर्यंत पोहोचवण्याचा सरकारचा प्रयत्न आहे. तसेच प्रत्येक कर्मचाऱ्याला लेखी नियुक्तीपत्र देणे कंपन्यांसाठी बंधनकारक करण्यात येणार असल्याने नोकरीतील अटी अधिक स्पष्ट आणि सुरक्षित होणार आहेत.