Odisha Cabinet : मंत्रीमंडळात उद्या मोठे फेरबदल ; नवीन चेहऱ्यांना संधी..

Odisha Cabinet News : ओडिशाचे मुख्यमंत्री नवीन पटनायक हे आपल्या मंत्रीमंडळात सोमवारी फेरबदल करण्याची शक्यता आहे. पटनायक यांच्या मुख्यमंत्रीपदाचा हा पाचवा कार्यकाळ आहे. (odisha cabinet chief minister naveen patnaik may reshuffle on monday)

मुख्यमंत्री म्हणून पटनायक यांच्या पाचव्या कार्यकाळातील त्यांच्या मंत्रीमंडळाचा हा दुसरा फेरबदल असेल. उद्या (सोमवारी) साडेनऊ वाजता लोकसेवा भवन येथे मंत्रीमंडळात फेरबदल होणार आहे.

राज्यमंत्रीमंडळात तीन मंत्रीपदे रिक्त आहेत. त्या जागी नवीन चेहऱ्यांना संधी देण्यात आहे. राज्यपाल गणेशी लाल हे हरियाणा येथे गेले आहेत ते सोमवारी परत येणार आहेत. ते आज (रविवार) सांयकाळपर्यंत ओडिशा येणार असल्याची माहिती सुत्रांनी दिली.

गेल्या आठवड्यात शालेय शिक्षणमंत्री समीर रंजन दास, आणि कामगारमंत्री श्रीकांत साहू यांनी राजीनामा दिला आहे. जानेवारीत आरोग्यमंत्री नबा किशोर दास यांच्या निधनानंतर त्यांची जागा रिक्त आहे.

ओडिशाच्या मंत्रीमंडळात मुख्यमंत्र्यांसह २२ मंत्री असतात, सध्या त्याची संख्या १९ आहेत. प्रफुल्ल सामल, देबी प्रसाद मिश्र, अमर प्रसाद सत्पथी आणि बद्री नारायण पात्र यांचा समावेश पटनायक सरकारमध्ये होऊ शकतो.

झारसुगुडा पोटनिवडणूक जिंकणाऱ्या दिवंगत नबा किशोर दास यांच्या कन्या दीपाली दास यांची मंत्रीमंडळात वर्णी लागू शकते का, याबाबत साशंकता आहे.

तर दुसरीकडे सहा वेळा आमदार म्हणून निवडणूक आलेले अरुखा यांना मंत्रीमंडळात संधी मिळू शकते, अशी चर्चा आहे. सुशांत सिंह, सारदा नायक, उमाकांत सामंत्रे यांच्या नावाचीही चर्चा आहे.

(Edited By : Mangesh Mahale)