Price Hike : सात दिवसात सहाव्यांदा इंधन दरवाढ; पेट्रोल-डिझेल चार रुपयांनी वाढले

नवी दिल्ली : आंतरराष्ट्रीय बाजारात कच्च्या तेलाचे दर २६.४२ टक्क्यांनी घटले असूनही देशात इंधन दरवाढीचा भडका उडाला आहे. (Petrol-Diesel) सोमवारी पेट्रोल ३० पैशांनी, तर डिझेल ३५ पैशांनी महागले. (Dehli) सोमवारच्या इंधन दरवाढीनंतर मुंबईत पेट्रोल तब्बल ११४.०८ रुपये, तर डिझेल ९८.४८ रुपये प्रतिलिटरवर पोहोचले आहे. मागील सात दिवसांत तेल वितरक कंपन्यांनी सहाव्यांदा पेट्रोल-डिझेलचे दर वाढवले आहेत. (Maharashtra)

एका आठवड्यात पेट्रोल-डिझेलचे दर लिटरमागे ४ रुपयांनी वधारले. दिल्लीत सोमवारी पेट्रोल ९९.४१ रुपये प्रति लिटरवर पोहोचले असून डिझेल ९०.७७ रुपये प्रति लिटरने विकले जात आहे. कोलकातामध्ये पेट्रोल १०८.८५ रुपयांवर पोहेचले असून डिझेल ९३.९२ रुपयांवर पोहोचले आहे. भोपाळ, जयपूरमध्ये पेट्रोल १११ रुपये प्रतिलिटरवर गेले आहे.

तर हैदराबादमध्ये पेट्रोल ११२.७१ रुपये प्रतिलिटरवर पोहोचले असून डिझेल ९९.०७ रुपये झाले आहे. कच्च्या तेलाचे दर फेब्रुवारीमध्ये १४० डॉलर प्रतिबॅरल इतक्या उचांकीवर पोहोचले होते. ते आता घसरून १०३ डॉलर प्रतिबॅरल झाले आहे.

असे असतानाही देशात तेल वितरक कंपन्यांनी सहा वेळा इंधनाचे दर वाढवले आहेत. मूडीजच्या मते इंधनाच्या सतत होणाऱ्या दरवाढीचे संकेत म्हणजे पेट्रोल-डिझेलचे दर एकदम न वाढवता ते टप्प्याटप्प्याने वाढवण्यात येतील.

आठवडाभरात इंधन महागाईचा भडका

२२ मार्च - घरगुती सिलिंडर ५० रुपयांनी महागले

२३ मार्च - पेट्रोल डिझेल ८० पैशांनी महागले

२५ मार्च - पेट्रोल डिझेल दुसऱ्यांदा ८० पैशांनी महागले

२६ मार्च - पेट्रोल डिझेल तिसऱ्यांदा ८० पैशांनी महागले

२७ मार्च - पेट्रोल ५० पैसे, तर डिझेल ५५ पैशांनी महागले

२८ मार्च - पेट्रोल ३० पैसे, तर डिझेल ३५ पैशांनी महागले