PM Modi on CJI Attack: सरन्यायाधीशांवरील हल्ल्याची PM मोदींकडून अखेर दखल! थेट CJI भूषण गवईंना केला फोन; म्हणाले, कौतुक...

PM Modi break silence on CJI Attack: भारताचे सरन्यायाधीश भूषण गवई यांच्यावर आज सुप्रीम कोर्टातच सुनावणीवेळी एका माथेफिरु वकिलानं पायतला बूट काढून तो गोंधळ घालत सरन्यायाधिशांपर्यंत पोहोचला आणि तो त्यांच्यावर फेकण्याचा प्रयत्न केला. सोमवारी सकाळी ही घटना घडल्यापासून आत्तापर्यंत सोशल मीडियावर CJI भूषण गवई हे ट्रेंडिंगमध्ये आहेत. सोशल मीडियावर अनेकांनी हा प्रकार अत्यंत निंदनीय असल्याचं सांगत संबंधित वकिलांवर कडक कारवाई करण्याची मागणी करत आहेत. यापार्श्वभूमीवर पंतप्रधान नरेंद्र मोदी यांनी देखील या प्रकरणाची दखल घेत थेट सरन्यायाधीशांना फोन करुन या घटनेचा निषेध नोंदवला. पंतप्रधानांनी स्वतः ट्विट करुन याची माहिती दिली आहे.

मोदींच्या ट्विटर अकाऊंटवरुन ट्विट केलं की, "भारताचे सरन्यायाधीश बी. आर. गवई यांच्याशी मी फोनवरुन बोललो. आज सकाळी सुप्रीम कोर्टाच्या आवारात त्यांच्यावर झालेल्या हल्ल्यानं प्रत्येक भारतीय संतापला आहे. आपल्या समाजात अशा निंदनीय कृत्यांना स्थान नाही, ते पूर्णपणे निषेधार्ह आहे. अशा परिस्थितीला तोंड देताना न्यायमूर्ती गवई यांनी दाखवलेल्या शांततेचे मी कौतुक करतो. ते न्यायमूर्तींच्या मूल्यांप्रती आणि आपल्या संविधानाच्या आत्म्याला बळकटी देण्याप्रती त्यांची वचनबद्धता अधोरेखित करते"

दरम्यान, सकाळी ही घटना घडली सोशल मीडियावर लोक व्यक्त व्हायला लागले पण अद्याप पंतप्रधानांनी कुठलीच प्रतिक्रिया कशी व्यक्त केली नाही? असे सवालही लोक सोशल मीडियावर विचारु लागले होते. काँग्रेस नेते आणि सुप्रीम कोर्टातील वरिष्ठ विधीज्ञ कपिल सिब्बल यांनी देखील ट्विट करुन पंतप्रधानांच्या मौनावर सवाल उपस्थित केला होता. त्यांनी आपल्या पोस्टमध्ये म्हटलं की, "सुप्रीम कोर्टातील एका वकिलाचं असं असंस्कृत वागण्याचा प्रत्येकानं सार्वजनिकरित्या निषेध केला पाहिजे. पण पंतप्रधानांचं, गृहमंत्र्यांचं आणि कायदा मंत्र्यांचं या प्रकरणावर मौन आश्चर्यकारक आहे"

आपल्यावर टीका होऊ लागल्यानंतर पंतप्रधानांनी सोमवारी रात्री साडे आठ वाजण्याच्या सुमारास ट्विट करुन आपणही या प्रकरणाची दखल घेतल्याचं सांगितलं. तसंच त्यांनी पोस्टमध्ये या कृत्याचा निषेधही नोंदवला. त्याचबरोबर ही घटना घडल्यानंतरही सरन्यायाधीशांनी आजिबात विचलित न होता आपलं न्यायदानाचं काम तसंच पुढे सुरु ठेवलं आणि याकडं दुर्लक्ष केलं. सरन्यायाधिशांच्या अशा प्रकारच्या निषेधाचं पंतप्रधानांनी कौतुक केलं आणि त्यांची संविधानाच्या मुल्यांप्रतिची कटिबद्धता आधोरेखित केली.

नेमकं काय घडलं?

भारताचे सरन्यायाधीश भूषण गवई यांच्यावर आज सुप्रीम कोर्टातच सुनावणीवेळी एका माथेफिरु वकिलानं पायतला बूट काढून तो गोंधळ घालत सरन्यायाधिशांपर्यंत पोहोचला आणि तो त्यांच्यावर फेकण्याचा प्रयत्न केला. यानंतर तिथं उपस्थित सुरक्षा रक्षकांनी या वकिलाला पकडलं आणि आपल्यासोबत घेऊन गेले. दरम्यान, सनातन धर्माचा अपमान सहन केला जाणार नाही, अशा घोषणा या वकिलानं भर कोर्टात दिल्या. या घटनेनंतर देशभरात संतापाची लाट उसळली आहे.