Narendra Modi : मोदींनी महाराष्ट्रातील प्रचाराचा नॅरेटिव्ह सेट केला! खर्गेंनीच आयते कोलीत दिले हाती...

New Delhi : महाराष्ट्र विधानसभा निवडणुकीच्या तोंडावर काँग्रेसचे राष्ट्रीय अध्यक्ष मल्लिकार्जून खर्गे यांनी भाजपच्या हाती आयते कोलीत दिले आहे. पंतप्रधान नरेंद्र मोदींनीही लगेच प्रचाराचे नॅरेटिव्ह सेट करत काँग्रेसवर हल्लाबोल चढवला आहे. काँग्रेसच्या विविध आश्वासनांवरून पंतप्रधानांनी निशाणा साधला आहे.

हिमाचल प्रदेश आणि कर्नाटकात काँग्रेसची सत्ता असून काही योजनांमध्ये राज्यांवर आर्थिक भार पडला आहे. कर्नाटकातील महिलांना मोफत बसची योजनाही गुंडाळण्याचा प्रयत्न सुरू आहे. त्यावरून खर्गेंनी सरकारचे कान उपटले आहेत. राज्य दिवाळखोरीत निघणार नाही, अशीच आश्वासने द्यायला हवीत, असा सल्लाच खर्गेंनी दिला आहे.

खर्गे यांचे हेच विधान भाजपसाठी आयते कोलीत ठरले आहे. त्यावरून शुक्रवारी मोदींनी ट्विट करत काँग्रेसवर जोरदार हल्ला चढवला. ते म्हणाले, काँग्रेस पक्षाला आता समजले आहे की, खोटी आश्वासने देणे सोपे आहे, पण त्याची अंमलबजावणी करणे अवघड किंवा असंभव आहे. ते प्रचारातून सातत्याने लोकांना आश्वासने देतात. पण त्यांना हेही माहिती असते की, ही आश्वासने पूर्ण होऊ शकत नाहीत.

आता लोकांसमोर काँग्रेसचा पर्दाफाश झाला आहे. आज काँग्रेसची सत्ता असलेल्या हिमाचल प्रदेश, कर्नाटक आणि तेलंगणा यापैकी कोणत्याही राज्यावर नजर टाकली तरी लक्षात येईल की, विकासाची गती आणि राज्याची आर्थिक स्थिती वाईट बनली आहे, अशी टीका मोदींनी केली आहे.

काँग्रेसची तथाकथित गॅरंटी अपूर्ण राहिली आहे. त्या राज्यांतील लोकांसोबत हा मोठा धोका आहे. असल्या राजकारणाचे गरीब, युवक, शेतकरी आणि महिला शिकार बनत आहेत. त्यांना योजनांपासून वंचित ठेवले जात आहे. सध्याच्या योजनाही कमजोर केल्या जात आहेत, असा निशाणाही मोदींनी साधला आहे.