Priya Saroj-Rinku Singh: खासदार प्रिया सरोज अन् क्रिकेटर रिंकू सिंह यांच्या लग्नाची तारीख अखेर फायनल; 'या' दिवशी अडकणार लग्नबंधनात

Priya Saroj-Rinku Singh Marriage Date Final : गेल्या वर्षभरापासून चर्चेत असलेली महिला खासदार अन् स्टार क्रिकेटरची जोडी अखेर या वर्षात लग्नबंधनात अडकणार आहे. अर्थात या खासदार म्हणजे समाजवादी पार्टीच्या खासदार प्रिया सरोज आणि स्टार क्रिकेटर रिंकू सिंह यांच्या लग्नाची तारीख निश्चित झाली आहे. नुकताच त्यांचा साखरपुडाही पार पडला होता.

उत्तर प्रदेशची राजधानी लखनऊच्या एका हॉटेलमध्ये रिंकू सिंह आणि प्रिया सरोज यांचा साखरपुडा पार पडला होता. यानंतर आता हे दोघे कधी लग्नबंधनात अडकणार याच्या चर्चा सुरु झाल्या होत्या. पण आता लग्नाची तारीख फायनल झाली असून येत्या ४ डिसेंबर २०२६ रोजी ही जोडी लग्नबंधनात अडकणार आहे. दोन्ही कुटुंबांकडून या लग्नाची तयारी देखील सुरु करण्यात आली आहे.

सेंट्रम हॉटेलमध्ये झाला होता साखरपुडा

रिंकू सिंह आणि प्रिया सरोज यांचा साखरपुडा लखनऊच्या सेंट्रम हॉटेलमध्ये पार पडला होता. दोन्ही कुटुंबिय आणि जवळच्या नातेवाईकांच्या उपस्थितीत हा कार्यक्रम पार पडला होता. आता साखरपुड्यानंतर विवाहाची तयारीनं वेग घेतला आहे.

रमाडा हॉटेलमध्ये पार पडणार विवाह सोहळा

रिंकू आणि प्रिया यांचा साखरपुडा एका हॉटेलमध्ये पार पडल्यानंतर आता लग्नसोहळा मात्र दुसऱ्या हॉटेलमध्ये पार पडणार आहे. लखनऊच्या रमाडा हॉटेलमध्ये हा विवाह सोहळा पार पडणार आहे. ४ डिसेंबर रोजी पार पडणाऱ्या या लग्न सोहळ्याला जवळचे नातेवाईक आणि मित्रमंडळींना तर निमंत्रण असणारच आहे. पण याशिवाय इतर कोणती मान्यवर मंडळी लग्नाला हजेरी लावणार हे अद्याप स्पष्ट झालेलं नाही.