Punjab AAP Political News: पंजाबमधील 2027 च्या विधानसभा निवडणुकीच्या पार्श्वभूमीवर आम आदमी पक्षाला मोठा राजकीय धक्का बसला आहे. पक्षातील तीन विद्यमान आमदारांनी अवघ्या दोन दिवसांत राजीनामा देत सोमवारी भारतीय जनता पक्षात प्रवेश केला.
अमृतसर उत्तरचे आमदार कुंवर विजय प्रताप सिंह, समाना मतदारसंघाचे चेतन सिंह जौडामाजरा आणि सनौरचे हरमीत सिंह पठाणमाजरा यांच्या पक्षांतरामुळे पंजाबच्या राजकारणात नव्या घडामोडींना सुरुवात झाली आहे.
या घडामोडीची सुरुवात रविवारी झाली. पटियाला जिल्ह्यातील समाना मतदारसंघाचे आमदार चेतन सिंह जौडामाजरा आणि सनौरचे आमदार हरमीत सिंह पठाणमाजरा यांनी आम आदमी पक्षाच्या प्राथमिक सदस्यत्वाचा राजीनामा दिला. त्यानंतर सोमवारी अमृतसर उत्तरचे आमदार कुंवर विजय प्रताप सिंह यांनी पंजाब विधानसभेच्या सदस्यत्वाचा राजीनामा दिल्याचे जाहीर केले. या तिन्ही नेत्यांनी सोमवारी भाजपमध्ये प्रवेश केला.
कुंवर विजय प्रताप सिंह हे माजी आयपीएस अधिकारी आहेत. 2022 च्या विधानसभा निवडणुकीपूर्वी त्यांनी आम आदमी पक्षात प्रवेश केला होता. मात्र, भगवंत मान सरकारच्या कार्यपद्धतीवरून त्यांचे पक्षनेतृत्वाशी मतभेद निर्माण झाले होते. विशेषतः 2015 मधील बरगाडी बेअदबी प्रकरण आणि त्यानंतरच्या पोलीस गोळीबाराच्या घटनांच्या तपासात न्याय मिळण्यास होत असलेल्या विलंबावरून त्यांनी सरकारवर टीका केली होती.
जानेवारी 2023 मध्ये तपासासंबंधी मतभेदांनंतर त्यांनी विधानसभा सरकारी आश्वासन समितीच्या अध्यक्षपदाचा राजीनामा दिला होता. राज्यातील अमली पदार्थांचा व्यापार, गुन्हेगारी, खंडणी आणि गँगस्टरच्या कारवायांवरूनही त्यांनी सरकारला लक्ष्य केले होते. त्यांच्या सार्वजनिक वक्तव्यांना पक्षविरोधी कारवाया मानून आम आदमी पक्षाने जून 2025 मध्ये त्यांना पाच वर्षांसाठी निलंबित केले होते.
दुसरीकडे, चेतन सिंह जौडामाजरा आणि हरमीत सिंह पठाणमाजरा यांच्या राजीनाम्याची वेळही महत्त्वाची मानली जात आहे. आम आदमी पक्षाने 2027 च्या विधानसभा निवडणुकीसाठी 40 उमेदवारांची पहिली यादी जाहीर केल्यानंतर दुसऱ्याच दिवशी या दोघांनी पक्ष सोडला. या यादीत समाना आणि सनौर या दोन्ही मतदारसंघांतील उमेदवारांची नावे नव्हती.
त्यातच पक्षाने समाना मतदारसंघाची जबाबदारी माजी अकाली नेते सुरजित सिंह राखरा यांच्याकडे, तर सनौरची जबाबदारी रणजोध हडाना यांच्याकडे सोपवली होती. त्यामुळे आगामी निवडणुकीत विद्यमान आमदारांना पुन्हा उमेदवारी मिळण्याबाबत प्रश्नचिन्ह निर्माण झाले होते.
पक्ष सोडल्यानंतर जौडामाजरा आणि पठाणमाजरा यांनी पंजाबच्या कारभारात दिल्लीतील नेतृत्वाचा हस्तक्षेप, अमली पदार्थांचा प्रश्न, भ्रष्टाचार आणि कायदा-सुव्यवस्थेच्या स्थितीवर टीका केली होती. त्यांच्या आरोपांवर आम आदमी पक्षाकडूनही प्रतिक्रिया देण्यात आली.
आता तिन्ही नेत्यांनी भाजपमध्ये प्रवेश केल्याने आगामी विधानसभा निवडणुकीच्या पार्श्वभूमीवर या पक्षांतराचे राजकीय परिणाम काय होतात, याकडे लक्ष लागले आहे. पंजाबमध्ये पुढील वर्षी विधानसभा निवडणूक होणार असल्याने सत्ताधारी आम आदमी पक्ष आणि भाजप या दोन्ही पक्षांसाठी पुढील काळातील राजकीय घडामोडी महत्त्वाच्या ठरणार आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.