Raghav Chadha : भाजपच्या जवळ गेलेल्या राघव चढ्ढांचे केजरीवालांनी पंख छाटले? तडकाफडकी केलेल्या कारवाईमागील 3 धक्कादायक कारणे

आम आदमी पक्षाने राज्यसभेतील खासदार राघव चड्ढा यांना उपनेतेपदावरून हटवण्याचा मोठा निर्णय घेतला आहे. त्यांच्या जागी आता अशोक मित्तल यांच्यावर ही जबाबदारी सोपवण्यात आली आहे. पंजाबमधून राज्यसभेत गेलेले राघव चड्ढा हे पक्षातील महत्त्वाचे आणि तरुण चेहरे मानले जात होते. मात्र अचानक झालेल्या या बदलामुळे राजकीय वर्तुळात चर्चांना उधाण आले आहे.

या कारवाईमागे काही महत्त्वाची कारणे समोर येत आहेत. पहिलं कारण म्हणजे स्वाती मालिवाल प्रकरणापासून राघव चढ्ढा यांनी आम आदमी पक्षापासून अंतर ठेवलं होतं. तसेच दिल्लीतील आबकारी धोरण प्रकरण (शराब घोटाला) या प्रकरणात पक्षाचे वरिष्ठ नेते अरविंद केजरीवाल, मनीष सिसोदिया तुरूंगातून सुटल्यानंतर त्यांनी कोणतीही प्रतिक्रिया दिली नव्हती, कोणतेही ट्विट केले नव्हते. याची खूप चर्चा झाली होती. पक्षासाठी हा संवेदनशील मुद्दा असताना त्यांची शांत भूमिका अनेकांच्या लक्षात आली.

दुसरं कारण म्हणजे राज्यसभेतील कामकाज. पक्षाच्या वतीने दिलेल्या वेळेत राघव चड्ढा वारंवार बोलत असल्याची तक्रार होती. मागील काही दिवसांत राघव चढ्ढा यांनी राईट टू रिकॉल, जिओ, एअरटेल आणि व्हीआय या कंपन्यांवर विचारलेले प्रश्न, पॅटर्निटी लिव्ह अशा विषयांवर मुद्दे मांडले होते. हे सोशल मीडियामध्ये चर्चेचे ठरले होते. त्यामुळे इतर खासदारांना बोलण्याची संधी कमी मिळत असल्याचं सांगितलं जात आहे.राज्यसभेतील भाषणांमधून ते स्वतःचा पीआर वाढवत असल्याचं बोललं जात होतं. यामुळे पक्षात नाराजी निर्माण झाली होती.

तिसरं आणि महत्त्वाचं कारण म्हणजे पक्षाच्या कामांमध्ये कमी सहभाग. गेल्या काही महिन्यांत राघव चड्ढा पक्षाच्या उपक्रमांमध्ये सक्रिय दिसत नव्हते, असा आरोप केला जात आहे. त्याचवेळी राघव चढ्ढा यांची भाजपसोबत जवळीक वाढताना दिसत आहे. ते भाजपमध्ये जाणार अशा सोशल मीडियावर चर्चा होत्या. पक्षात अनेक घडामोडी होत असताना त्यांनी फारसं मत व्यक्त केलं नाही, याकडेही लक्ष वेधलं जात आहे.

आता या निर्णयानंतर राघव चड्ढा पुढे कोणती भूमिका घेतात, याकडे सर्वांचे लक्ष लागले आहे. आता त्यांच्या राजकीय प्रवासात पुढे काय घडते, हे पाहणे महत्त्वाचे ठरणार आहे.