Rahul Gandhi : राहुल गांधींनी स्वीकारली लिंगायत पंथाची दीक्षा

Rahul Gandhi : बंगळूर : काँग्रेसचे (Congress) नेते खासदार राहुल गांधी (Rahul Gandhi) यांनी बुधवारी विविध नेत्यांच्या उपस्थितीत मध्य कर्नाटकातील (Karnataka) चित्रदुर्ग जिल्हा मुख्यालयातील प्रसिद्ध श्री मुरुघराजेंद्र मठाला भेट दिली. या वेळी विविध मठांच्या लिंगायत स्वामींशी राहुल गांधी यांनी संवाद साधला. त्यानंतर मुरुघराजेंद्र मठाचे स्वामी शिवमूर्ती मुरुघ शरण यांनी त्यांना लिंगायत संप्रदायाची दीक्षा दिली.

''जगद्‍गुरू मुरुघराजेंद्र विद्यापीठाला भेट देणे आणि डॉ. श्री शिवमूर्ती मुरुघ स्वामी यांच्याकडून ‘इष्टलिंग दीक्षा’ घेणे हा अत्यंत सन्मान आहे'' असे गांधी यांनी ट्विट केले. जगद्‍गुरू बसवण्णांची शिकवण चिरंतन आहे आणि मठाच्या स्वामींकडून त्याबद्दल अधिक जाणून घेण्यास मी नम्र आहे, असे ते पुढे म्हणाले.

आज या ऐतिहासिकप्रसंगी मुरुघ स्वामी यांनी राहुल गांधींना 'इष्टलिंग दीक्षा' दिली. हा एक विलक्षण क्षण आहे, असे मठाच्या अधिकाऱ्याने सांगितले. स्वामींनी राहुल गांधींच्या गळ्यात 'शिवलिंग' घातले आणि त्यांच्या कपाळावर 'विभूतीं'ची तीन बोटे ओढली, असे कर्नाटक प्रदेश काँग्रेस समितीने निवेदनात म्हटले आहे.