Rahul Gandhi Video : आता तुमच्या लग्नाची वाट पाहतोय..! 237 वर्षे जुन्या मिठाईच्या दुकानात राहुल गांधींचा अनोखा अंदाज...

Historic Significance of Delhi’s Ghantewala Sweet Shop : देशभरात दिवाळी उत्साहात साजरी होत असून काँग्रेस नेते राहुल गांधी यांनीही अनोख्या पध्दतीने दिवाळी सेलिब्रेशन केले. त्यांनी सोमवारी दिल्लीतील प्रसिध्द आणि ऐतिहासिक घंटेवाला मिठाई दुकानात जाऊन बेसनाचे लाडू, इमरती तयार करण्याचा आनंद लुटला. राहुल यांनी सोशल मीडियातून याची माहिती दिली आहे.

राहुल यांनी मिठाई बनवितानाचा व्हिडीओही सोशल मीडियात पोस्ट केला आहे. या पोस्टमध्ये त्यांनी म्हटले आहे की, अनेक वर्षे जुन्या असलेल्या या प्रतिष्ठित दुकानाचा गोडवा आजही तोच आहे, शुध्द, पारंपरिक आणि मनाला भिडणारी. दिवाळीचा खरा गोडवा केवळ थाळीत नाही तर नाती आणि समाजातही असतो. तुम्ही सर्वांनी सांगा, तुम्ही तुमची दिवाळी कशी साजरी करत आहात आणि कशी खास बनवत आहात?

राहुल गांधी यांनी पोस्ट केलेल्या व्हिडीओमध्ये दुकानातील मालक व इतरांसोबतचा संवादही आहे. राहुल यांनी मिठाई बनविण्याची संपर्ण प्रक्रियाही समजून घेतली. इमरतीची सुरूवात कधीपासून झाली, इतर मिठाईची माहितीही त्यांनी घेतली. त्याचप्रमाणे इमरती आणि बेसनाचे लाडूही बनविले.

ऐतिहासिक मिठाई दुकान

राहुल गांधींनी भेट दिलेले घंटेवाला मिठाई दुकान 237 वर्षांपूर्वीचे आहे. देशाचे पहिले पंतप्रधान जवाहरलाल नेहरू यांच्यापासून राजीव गांधीपर्यंत गांधी कुटुंबातील सर्वचजण या दुकानातील मिठाचे चाहते होते. विशेष म्हणजे राजीव गांधी यांच्या लग्नातही या दुकानातूनच मिठाई पाठविण्यात आली होती. दुकानाच्या मालकांनी राहुल गांधींना त्याची आठवण करून दिली.

दुकानाचे मालक म्हणाले, ‘आपण जवाहरलाल नेहरूंपासून तुमची बहीण प्रियांका गांधींपर्यंत सगळ्यांना मिठाई खाऊ घातली आहे. आता आम्ही तुमच्या लग्नाची वाट पहातोय. तुम्ही लवकर लग्न करा आणि आमच्याकडूनही मिठाई न्या.’ दोघांमधील या संवादाला मिठाई दुकान मालकाचे कुटुंबीय आणि दुकानातील कर्मचाराऱ्यांनीही दाद दिली.