Rajya Sabha Session : मर्यादेत राहा! जगदीप धनखड यांचा पारा चढला, खर्गेंना सुनावलं...

New Delhi : केरळातील वायनाडमध्ये मध्यरात्री झालेल्या भूस्खलनाच्या दुर्घटनेत आतापर्यंत 49 जणांचा मृत्यू झाला आहे. या घटनेचे पडसाद मंगळवारी राज्यसभेतही उमटले. विरोधी पक्षनेते मल्लिकार्जून खर्गे यांनी हा मुद्दा उपस्थित केला. पण यादरम्यान राज्यसभेचे सभापती जगदीप धनखड आणि खर्गे यांच्यात खडाजंगी झाली.

मल्लिकार्जून खर्गे यांनी वायनाडमधील दुर्घटनेचा मुद्दा उपस्थित करण्याआधी धनखड यांनी तेथील स्थितीची माहिती सभागृहाला दिली. सुर्योद्य होण्याआधीपासून बचावकार्य सुरू झाले असून केरळच्या मुख्यमंत्र्यांशीही चर्चा झाल्याचे त्यांनी सांगितले. राज्य व केंद्र सरकारची यंत्रणा मिळून हे काम करत असल्याची माहिती त्यांनी दिली.

धनखड यांच्यानंतर खर्गे यांनी याबाबत सरकारकडून स्पष्टीकरण द्यावे, अशी मागणी लावून धरली. बचावकार्य कसे सुरू आहे, कोणत्या यंत्रणा कार्यरत आहेत, काय मदत केली जात आहे, आदी माहिती सरकारने द्यावी, असे ते म्हणाले. मात्र, त्यावरून धनखड संतापलेले दिसले. तुम्हाला काय म्हणायचे आहे ते मी समजलो. मला माहिती आहे, मी काय माहिती द्यायला हवी. मेहरबानी करून तुम्ही मर्यादित आचरण करा, असे धनखड यांनी सुनावलं.

केरळमधील खासदारांनीही बोलू देण्याची मागणी केली. त्यानंतर सर्वच पक्षाच्या खासदारांनी आपले म्हणणे मांडले. सरकारकडून सभागृहाचे नेते जे. पी. नड्डा यांनी याबाबत माहिती दिली. पंतप्रधान नरेंद्र मोदी आणि केरळच्या मुख्यमंत्र्यांमध्ये दुरध्वनीवरून चर्चा झाली असून बचावकार्यासाठी सर्वप्रकारची मदत केली जात आहे केंद्रीय राज्यमंत्री जॉर्ज कुरियन यांना त्याठिकाणी पाठवले असल्याचे त्यांनी सांगितले.

राहुल व प्रियांका गांधी उद्या जाणार

दरम्यान, वायनाड मतदारसंघाचे माजी खासदार राहुल गांधी व या मतदारसंघातून पोटनिवडणूक लढणार असलेल्या प्रियांका गांधी बुधवारी घटनास्थळी भेट देणार असल्याचे समजते. पंतप्रधान मोदींसह राहुल यांनीही सकाळी एक्सवर पोस्ट करत या घटनेबाबत दु:ख व्यक्त केले आहे.