Video Rajya Sabha Session Live : राज्यसभेतच महिला खासदार बेशुध्द पडल्या; तातडीने रुग्णालयात केले दाखल  

New Delhi : संसदेच्या अधिवेशनादरम्यान शुक्रवारी राज्यसभेत एका महिला खासदारांना अचानक चक्कर आली. त्या सभागृहातच बेशुध्द पडल्यानंतर त्यांना तातडीने आरएमएल रुग्णालयात दाखल करण्यात आले आहे. इतर महिला खासदार त्यांना रुग्णवाहिकेतून रुग्णालयात घेऊन गेल्या.

काँग्रेसच्या राज्यसभेच्या खासदार फुलो देवी या शुक्रवारी इतर खासदारांसोबत नीटवर चर्चेसाठी आवाज उठवत होत्या. नीटवर सविस्तर चर्चेची मागणी खासदारांकडून केली जात होती. यादरम्यान फुलो देवी यांना अचानक चक्कर आली. इतर खासदारांनी त्यांना सावरले.

फुलो देवी यांना स्ट्रेचरवर संसदेतून बाहेर आणत असल्याचा व्हिडिओ समोर आला आहे. त्यांच्यासोबत संसदीय कार्यमंत्री किरण रिजिजू, खासदार स्वाती मालीवाल रजनी पाटील, इम्रान प्रतापगढी आदी दिसत आहेत. फुलो देवी यांना रुग्णवाहिकेतून रुग्णालयात नेण्यात आले. त्यांच्यासोबत मालीवाल आणि पाटीलही असल्याचे व्हिडिओमध्ये दिसत आहे.

दरम्यान, फुलो देवी नेताम या छत्तीसगढमधील बस्तर भागातील आहेत. त्या 14 सप्टेंबर 2020 पासून राज्यसभेच्या सदस्य आहेत. राज्यसभेच्या विशेषाधिकार समितीने त्यांना मागील वर्षी ऑगस्ट महिन्यात इतर 12 खासदारांसह निलंबित करण्यात आले होते. संसदेच्या कामकाजात अडथळा आणल्याचा ठपका त्यांच्यावर ठेवण्यात आला होता.

विशेषाधिकार समितीने गुरूवारी आपला अहवाल सादर केला होता. त्यानंतर फुलो देवी यांच्यासह इतर खासदारांना ताकीद देण्यात आली होती. फुलो देवी यांच्यासह संजय सिंह, शक्तीसिंह गोहिल, सुशील कुमार गुप्ता, संदीप कुमार पाठक, सैयद नासीर हुसैन, जेबी माथेर हिशाम, रंजीत रंजन आणि इम्रान प्रतापगढी या खसादरांचा त्यामध्ये समावेश आहे.