Ramdev Baba US tariff : रामदेव बाबा संतापले : अमेरिकन कंपन्यांवर बहिष्कार टाका, ट्रम्पला झुकवू!

Ramdev Baba : अमेरिकेने भारतावर कालपासून (27 ऑगस्ट) 50 टक्के टॅरिफ लागू केलं आहे. भारतीय बाजारपेठेवर त्याचा थेट परिणाम होणार असल्याने देशभरातून निषेध नोंदवला जात आहे. अमेरिकेविरोधात विविध स्तरातून यावर विविध प्रतिक्रिया उमटत असून योग गुरु रामदेव बाबा यांनीही आता अमेरिकेच्या राष्ट्राध्यक्ष डोनाल्ड ट्रम्प यांच्यावर निशाणा साधला आहे. ट्रम्प यांनी 50 टक्के आयात शुल्क लागू करुन मोठी चूक केली आहे असं रामदेव बाबांनी म्हटलं आहे.

रामदेव बाबा म्हणाले, टॅरिफ च्या माध्यमातून अमेरिकेने ही राजकीय गुंडगिरी सुरु केली आहे. अमेरिका भारताच्या कृषी क्षेत्रात घुसखोरी करू पाहत आहे. ते म्हणाले की, आता भारताने एकत्र येऊन अमेरिकेवर आर्थिक बहिष्कार टाकण्याची वेळ आली आहे. अमेरिकीन कंपन्या, त्यांचे ब्रांड यांच्यावर बहिष्कार घाला. एकाही भारतीयाने पेप्सी, कोका कोला, सबवे, केएफसी आणि मॅक डोनाल्ड्स या ठिकाणी जाऊ नये असं आवाहन रामदेव बाबांनी केलं आहे.

रामदेव बाबा पुढे म्हणाले, आपण सगळे भारतीय प्रतिज्ञा करूया की आपण परदेशी ब्रँडऐवजी स्वदेशी उत्पादने वापरू. यामुळे भारत स्वावलंबी होईल.'अमेरिकेच्या सगळ्या कंपन्या आणि ब्रांड्सवर असा बहिष्कार टाका की तिथे खळबड उडाली पाहिजे. तिथे महागाई एवढी वाढेल की डोनाल्ड ट्रम्प स्वतःहून टॅरिफ मागे घेतील असं रामदेव बाबा म्हणाले.

भारताला मैन्युफैक्चरिंग हब बनवावे लागेल. आपल्याला चीनसारख्या उद्योगांना जमीन, वीज आणि कर सुविधा द्याव्या लागतील. भारताची अर्थव्यवस्था एकेकाळी 400 दशलक्ष डॉलर्सची होती. पण परकीय आक्रमकांनी आपल्याला लुटले आणि कमकुवत केले. आज आपल्याला परकीय कंपन्यांपेक्षा चांगली उत्पादने बनवून त्यांना धक्का देण्याची गरज आहे. असं रामदेव बाबा म्हणाले.

भारताने यातून घाबरुन जावू नये, आपण या आव्हानांचा सामना करु शकतो. ट्रम्प हे सरड्याप्रमाणे रंग बदलत आहेत. भारताशी दादागिरीने वागून त्यांनी मोठी चूक केली आहे. आपल्याकडे आता संधी असून अमेरिकेतील कंपन्यावर व उत्पादनांवर बहिष्कार टाका. अमेरिका हा एक सभ्य देश मानला जात होता. पण टोनाल्ड ट्रम्प यांनी सगळी मूल्य पायदळी तुडवली आहेत, असं रामदेव बाबा म्हणाले.