MLA BR Patil News : आमदार पाटील यांचा तडकाफडकी राजीनामा; CM चे सल्लागारपद सोडले, कर्नाटकात उलथापालथ

Karnataka Latest Political News : कर्नाटकात अनेक ऑपरेशन लोटसची चर्चा होते. भाजपकडून काँग्रेसचे आमदार फोडण्याचे प्रयत्न सुरू असल्याचा आरोप केला जातो. या चर्चा सुरू असतानाच काँग्रेसला मोठा धक्का बसला आहे. मुख्यमंत्री सिध्दरामय्या यांचे राजकीय सल्लागार आमदार बी. आर. पाटील यांनी आपल्या पदाचा तडकाफडकी राजीनामा दिला आहे.

आमदार पाटील यांनी शनिवारी पदाचा राजीनामा देत आमदार म्हणून काम करत राहणार असल्याचे स्पष्ट केले आहे. त्यांच्या अचानक राजीनाम्यामुळे कर्नाटकच्या राजकारणात वादळ येण्याची शक्यता व्यक्त केली जात आहे. पाटील हे कर्नाटक काँग्रेसमध्ये अत्यंत अनुभवी आणि ज्येष्ठ नेते आहेत. ते मुख्यमंत्र्यांचे विश्वासू सहकारी म्हणून ओळखले जातात.

कर्नाटकात काही आठवड्यांपूर्वी मुख्यमंत्री बदलाच्या चर्चा सुरू होत्या. तसेच सध्या प्रदेशाध्यक्षपदावरून चर्चांना उधाण आले आहे. पाटील यांच्या राजीनाम्यामागे या बदलांचेही कारण दिले जात आहे. काँग्रेसमधील अन्य काही नेत्यांमध्येही नेतृत्व बदलावरून मतभेद असल्याचे यापूर्वी समोर आले आहे. पाटील यांच्या राजीनाम्यामुळे इतर नेत्यांकडूनही आता उघडपणे भाष्य केले जाण्याची शक्यता व्यक्त केली जात आहे.

राजीनाम्यावर बोलताना पाटील यांनी म्हटले आहे की, ‘मुख्यमंत्र्यांकडे मी राजीनामा सोपला आहे. मी एक आमदार म्हणून काम करत राहीन. मला कोणत्याही पदाची गरज नाही.’ पाटील हे 1983 पासून आमदार आहे. सिध्दरामय्या यांच्याप्रमाणे डोक्यावर गांधी टोपी परिधान करणारे ते विधिमंडळातील एकमेव आमदार आहेत. काँग्रेसचे कट्टर समर्थक म्हणून त्यांच्याकडे पाहिले जाते.

धोरणांना विरोध

आमदार पाटील हे अनेक मुद्द्यांवर उघडपणे आपली भूमिका मांडत असतात. त्यांनी सरकारच्या नवीन मद्य दुकान परवाना धोरणालाही विरोध केला होता. इतर निर्णयांवरही त्यांचा विरोध समोर आला आहे. काँग्रेसमधील अंतर्गत गटबाजीवर त्यांची नाराजी असल्याची चर्चा आहे. मंत्रिपदसाठीही ते इच्छूक होते, पण त्यांना वगळण्यात आले होते. मात्र, पाटील यांनी राजीनामा देण्यामागचे कारण स्पष्ट केलेले नाही. सरकारमधील मंत्री प्रियांक खर्गे यांनीही राजीनाम्याचे कारण माहिती नसल्याचे सांगितले आहे.