Sarpanch Election result : सरपंचपदाच्या निवडणुकीत मोठा उलटफेर; आधी 36 मतांनी पराभव, चार महिन्यांनी झालेल्या पुनर्मोजणीत 44 मतांनी विजय

Election result update : देशातील अनेक निवडणुकांमध्ये फेरफार होत असल्याचा आरोप विरोधी पक्षांकडून केला जात आहे. हे आरोप-प्रत्यारोप सुरू असतानाच एका सरपंचपदाच्या निवडणुकीतील धक्कादायक उलटफेर समोर आला आहे. मतदानानंतर झालेल्या निवडणुकीत महिला एका महिला उमेदवाराचा ३६ मतांनी पराभव होतो. त्यावर आक्षेप घेत त्या पुनर्मोजणीची मागणी करतात अन् चार महिन्यांनी त्या ४४ मतांनी विजयी झाल्याचा निकाल लागतो.

हिमाचल प्रदेशातील चंबा जिल्ह्यातील ही घटना आहे. ठाकरी मट्टा ग्रामपंचायतीची निवडणूक मे महिन्यांत पार पडली होती. सरपंचपदाच्या निवडणुकीत भारती ठाकूर आणि संतोष कुमारी यांच्यात लढत झाली होती. या निवडणुकीत कुमारी यांना ५९७ तर ठाकूर यांना ५६१ मेत मिळाली होती. त्यानुसार ठाकूर यांचा ३६ मतांनी पराभव झाला होता.

निवडणूक निकालावर आक्षेप घेत ठाकूर यांनी निवडणूक अधिकाऱ्यांकडे पुनर्मोजणीची मागणी केली. त्यांच्या मागणीतील आक्षेपांचा विचार करत अधिकाऱ्यांनीही पुनर्मोजणीचे आदेश दिले. त्यासाठी तीन वरिष्ठ अधिकाऱ्यांची एक समिती स्थापन करण्यात आली. या समितीसमोर नुकतीच पुनर्मोजणी झाली. त्यामध्ये ठाकूर यांना ६०१ तर संतोष कुमारी यांना ५५७ मते मिळाली.

पुनर्मोजणीत ठाकूर या ४४ मतांनी विजयी झाल्याचे अधिकाऱ्यांनी जाहीर केले. चार महिन्यांपूर्वी विजयी झालेल्या संतोष कुमारी यांना पुनर्मोजणीत मोठा झटका बसला आहे. विशेष म्हणजे पुनर्मोजणीमध्ये चार मतै अवैधही ठरविण्यात आली. या निकालानुसार आता ठाकूर या ठाकरी मट्टा गावच्या सरपंचपद भूषवतील.

दरम्यान, निवडणुकीतील उलटफेरानंतर सुरूवातीला झालेल्या मतमोजणीतील गोंधळावर प्रश्नचिन्ह उपस्थित झाले आहे. यापूर्वीही असे प्रकार अनेकदा समोर आले आहेत. टपाली मतदानातील घोळ, वैध मते अवैध ठरविणे किंवा अवैध मतांची मोजणी करणे, असे प्रकार समोर आले आहे. अनेकदा कोर्टातही अशी प्रकरणे गेली आहेत. कोर्टाच्या आदेशानंतर झालेल्या पुनर्मोजणीत पराभूत उमेदवार विजयी झाले आहेत.