Video YSRCP Office Demolish : पुन्हा बुलडोझर..! जगन मोहन रेड्डींना तिसरा धक्का; चंद्राबाबू नायडू 'त्या' अश्रूंचा सूड घेतायत का?

Andgra Pradesh Politics : आंध्र प्रदेशात सत्ता उलथवल्यानंतर मुख्यमंत्री चंद्राबाबू नायडू सूडाचे राजकारण करत असल्याची टीका होऊ लागली आहे. सत्तांतरानंतर फक्त दोन आठवड्यातच प्रशासन माजी मुख्यमंत्री जगनमोहन रेड्डी यांच्या मागे हात धुवून लागले आहे. आता विजयवाडा येथील ताडेपल्ले जिल्ह्यातील 'वायएसआरसीपी'चे कार्यालय शनिवारी सकाळी जमीनदोस्त करण्यात आले.

सत्ताबदलानंतर आंध्रात आतापर्यंत सरकारने जगनमोहन रेड्डी यांची दोन कार्यालयांवर बुलडोजर चढवले तर अलिशान महल सील केला आहे. वायएसआरसीपीचे हे कार्यालय पाडण्यासाठी बुलडोझरचा वापर करण्यात आला. यानंतर वायएसआरसीपीने हे आता सूडाचे राजकारण असल्याचे म्हटले आहे.

ताडापल्ली येथील पक्षाचे कार्यालय शनिवारी (ता. २२) पहाटे बुलडोझरने फोडले. हे कार्यालय बेकायदेशीर जमीन ताब्यात घेऊन बांधल्याचा आरोप होता. त्यावर वायएसआरसीपी पक्षाने न्यायालयात धाव घेतली होती. मात्र निकाल येण्यापूर्वीच कार्यालय पाडण्यात आले.

वायएसआरसीपीकडून या कारवाईच निषेध केला जात आहे. राज्याच्या इतिहासात पक्षाचे कार्यालय फोडण्याची ही कारवाई पहिल्यांदाच घडली आहे. पहाटे साडेपाचच्या सुमारास बुलडोझरच्या सहाय्याने इमारत फोडून पाडण्यात आली, असा आरोपही त्यांनी केला.

सत्तेत येताच मुख्यमंत्री नायडूंनी आपले विरोधक वायएसआरसीपीचे नेते जगनमोहन रेड्डी यांच्यावर कारवाईचा धडाकाच लावल्याचे बोलले जात आहे. नायडू आपल्या अडीच वर्षांपूर्वीच्या आश्रूंचा बदला तर घेत नाहीत ना असाही प्रश्न उपस्थित केला जात आहे.

चंद्राबाबूंच्या आश्रूंची कहाणी

आंध्र प्रदेश विधानसभेच्या अधिवेशनादरम्यान 19 नोव्हेंबर 2021 रोजी वायएसआरसीपी नेत्यांनी चंद्रबाबू नायडू यांच्यावर जोरदार टीका केली. तसेच त्यांच्यासह त्यांच्या पत्नीवरही काही आक्षेपार्ह टिप्पणी केल्या होत्या. ती टीका जिव्हारी लागल्याने चंद्राबाबू नायडू सभागृहातून बाहेर पडले. त्यावेळी नायडू यांनी सत्तेत परत येईपर्यंत सभागृहात पाय ठेवणार नाही, अशी शपथ घेतली आणि त्याचवेळी ते ढसाढसा रडले होते.