धक्कादायक : ओवेसींच्या हत्या करून दोघांना बनायचा होतं हिंदुत्ववादी नेता!

लखनऊ : एमआयएमचे (AIMIM) सर्वेसर्वा खासदार असदुद्दीन ओवेसी (Asaduddin Owaisi) यांच्यावर फेब्रुवारी महिन्यात झालेल्या हल्ल्याचा उलगडा झाला आहे. ओवेसी यांच्या कारवर उत्तर प्रदेशातील (Uttar Pradesh) मेरठ जवळ दोघांकडून गोळ्या झाडण्यात आल्या होत्या. या हल्ल्यानंतर दोघांना अटक करण्यात आली होती. या प्रकरणी पोलिसानी आरोपपत्र दाखल केले असून त्यातून धक्कादायक खुलासा झाला आहे.

हल्ल्यातून ओवेसी थोडक्यात बचावले होते. याप्रकरणी सचिन आणि शुभम या दोघांना अटक करण्यात आले आहे. ओवेसी यांना जीवे मारण्यासाठीच हा हल्ला केल्याची कबुली या आरोपींनी दिली आहे. पोलिसांनी दाखल केलेल्या आरोपपत्रानुसार, 'दोघांना मोठा हिंदुत्ववादी नेता बनायचे होते. ओवेसी यांची हत्या करून प्रसिध्द व्हायचे होते.' दोघांनीही गुन्हा कबूल केला आहे.

'आज तक'ने दिलेल्या वृत्तानुसार, आरोपी सचिन आणि शुभमने जाती आणि धर्माच्या आधारावर देशात दोन्ही धर्मांमध्ये वाद निर्माण करण्याचा प्रयत्न केला. हल्ल्यात खासदार किंवा अन्य कोणी जखमी जरी झाले असते तरी केवळ हापुड या भागातच नाही तर संपूर्ण उत्तर प्रदेशातील कायदा-सुव्यवस्था बिघडली असती. एवढंच नाही तर या घटनेनंतर काही लोकांनी त्याचा वापर करून परिस्थिती आणखी खराब केली असती, असं आरोपपत्रात नमूद केलं आहे.

दरम्यान, हल्लातील मुख्य सुत्रधार सचिन (Sachin) ओवेसीचे भाषण ऐकून तो अस्वस्थ झाला होता. सचिनने त्याचा जवळचा मित्र शुभमसोबत (Shubham) ओवेसींच्या हत्येचा कट रचला, अशी माहिती पोलिसांच्या चौकशीत समोर आली आहे. पण जेव्हा त्यांनी ओवेसींवर गोळीबार केला तेव्हा ओवेसी खाली वाकले. त्यांनी खाली गोळी झाडली आणि ते पळून गेले, असेही त्यांनी पोलीस चौकशीत सांगितले.

अनेक दिवसांपासून सचिन आणि शुभम यांची ओवेसींवर हल्ला करण्याची योजना करत होते. सोशल मीडियाच्या माध्यमातून ते ओवेसींची हालचालींवर सतत लक्ष ठेवून होते. त्यांच्यावर हल्ला करण्याची संधी मिळावी यासाठी सचिन आणि शुभम यांनी ओवेसींच्या अनेक सभांनाही हजेरी लावली होती. मात्र गर्दीमुळे त्यांना हल्ला करता आला नाही. ओवेसी मेरठहून दिल्लीला जाणार असल्याची माहिती त्यांना मिळाली आणि ते ओवेसींच्या आधी टोलगेटवर पोहोचले. त्यांची गाडी येताच दोघांनीही त्यांच्या कारवर गोळीबार केला, असंही पोलीस चौकशीत स्पष्ट झालं आहे.