JP Nadda : जे. पी. नड्डा यांच्यावर संसदेत मोठी जबाबदारी; पियूष गोयल यांची जागा घेणार

New Delhi : भाजपचे राष्ट्रीय अध्यक्ष जे. पी. नड्डा यांच्यावर संसदेत मोठी जबाबदारी सोपवण्यात आली आहे. पंतप्रधान नरेंद्र मोदी यांनी त्यांना आपल्या मंत्रिमंडळामध्ये आरोग्यमंत्रिपद दिले आहे. त्यानंतर आता त्यांना राज्यसभेत सभागृह नेते बनविण्यात आले आहे.

जे. पी. नड्डा केंद्रीय मंत्री पियूष गोयल यांची जागा घेतील. गोयल हे मुंबईतून लोकसभा निवडणुकीत विजयी झाले आहेत. ते राज्यसभेचे सदस्य असताना मागील टर्ममध्ये सभागृह नेते होते. त्यांच्याजागी आता ही जबाबदारी नड्डा सांभाळणार आहेत.

भाजपचे अध्यक्ष म्हणून नड्डा यांचा कार्यकाळ सात जानेवारीला संपला आहे. मात्र, लोकसभा निवडणुकीमुळे त्यांना सहा महिन्यांची मुदतवाढ देण्यात आली होती. आता त्यांची मुदत पुढील काही दिवसांत संपत आहे. त्याआधीच त्यांना पुन्हा नवीन जबाबदारी देण्यात आली. आहे.

नड्डा हे मोदी सरकारच्या पहिल्या टर्ममध्येही आरोग्यमंत्री होते. 2019 मध्ये त्यांच्याकडे पक्षाच्या कार्यकारी अध्यक्षपदाची धुरा देण्यात आली. त्यानंतर जानेवारी 2020 पासून ते राष्ट्रीय अध्यक्ष आहेत. आता या पदाचा कार्यकाळ संपत असल्याने त्यांना पुन्हा मंत्रिमंडळात स्थान देण्यात आले आहे.

63 वर्षीय नड्डा यांनी अखिल भारतीय विद्यार्थी परिषेदतून आपल्या राजकीय वाटचालीला सुरूवात केली. ते 1991 मध्ये भारतीय जनता युवा मोर्चाचे अध्यक्ष बनले. त्यांनी पक्षातील अनेक महत्वाच्या पदांवर काम केले आहे. निवडणुकीत अनेक राज्यांचे प्रचारात नेतृत्वही केले आहे. हिमाचल प्रदेशमधील सरकारमध्येही ते मंत्री होते.

नवीन अध्यक्ष कोण?

नड्डा यांचा कार्यकाळ संपत असल्याने त्यांची जागा कोण घेणार, याबाबत उत्सुकता वाढली आहे. महाराष्ट्रातील नेते आणि पक्षाचे सरचिटणीस विनोद तावडे यांच्याही नावाची जोरदार चर्चा आहे. पुढील काही दिवसांत भाजपला नवीन अध्यक्ष मिळू शकतात.