साडेचार तासात खारकीव सोडा! भारताकडून विद्यार्थ्यांसाठी धोक्याची घंटा

नवी दिल्ली : युक्रेनची (Ukraine) राजधानी कीवसह खारकीव या देशातील दुसऱ्या क्रमांकाच्या शहरात रशियाकडून (Russia) जोरदार हल्ला चढवण्यात आला आहे. पुढील काही तासांत रशियाकडून खारकीववर कब्जा केला जाण्याची शक्यता आहे. यापार्श्वभूमीवर युक्रेनमधील भारतीय दुतावासाने भारतीयांना रात्री साडे नऊ वाजण्याच्या आत खारकीर शहर सोडण्याचे आवाहन केलं आहे. (Russia Ukraine War News)

भारतीय दुतावासाने (Indian Embassy) ट्विटरवरून ४ वाजून ५७ मिनिटांनी याबाबतची अडव्हायजरी जारी केली आहे. त्यामध्ये कोणत्याही परिस्थितीतच आजच खारकीव सोडण्यास सांगण्यात आले आहे. ‘भारतीय नागरिकांनी आपल्या सुरक्षेसाठी तातडीने खारकीव सोडावे. खारकीवमधून पेसोचीन, बाबेय आणि बेझल्युडोव्हकाकडे लवकरात लवकर निघावे. कोणत्याही परिस्थितीत आजच याठिकाणी पोहचावे,’ असं दुतावासाकडून स्पष्ट करण्यात आलं आहे.

दुतावासाने युक्रेनियन वेळेनुसार सायंकाळी सहा वाजेपर्यंतची वेळ दिली आहे. भारतीय प्रमाणवेळेनुसार रात्री साडे नऊपर्यंत भारतीयांना खारकीव सोडण्यास सांगण्यात आले आहे. याचा अर्थ दूतावासाच्या ट्विटनंतर भारतीयांकडे खारकीव शहर सोडण्यासाठी केवळ साडेचार तासांचा कालावधी उरला आहे.

दरम्यान, दुतावासाने मंगळवारी कीवमध्ये अडकलेल्या भारतीय नागरिकांना तिथून तातडीने बाहेर पडण्याचे आवाहन केले होते. आजच तातडीने कीवमधून बाहेर पडावे. प्राधान्याने उपलब्ध रेल्वेगाड्या किंवा इतर कोणत्याही उपलब्ध माध्यमातून कीव सोडा,' असं आवाहन दुतावासाकडून करण्यात आलं होतं. आता सलग दुसऱ्या दिवशी खारकीवमधूनही तातडीने बाहेर पडण्याचे आवाहन करण्यात आले आहे. याच शहरामध्ये नवीन शंकरप्पा या भारतीय विद्यार्थ्याचा रशियाच्या बॉम्बहल्ल्यात मृत्यू झाला आहे. (Russia-Ukraine War Update)