BJP Government : आमदार-खासदार गयावया करता, तरी कामे होत नाहीत! मोदींच्या मंत्रिमंडळात काम केलेल्या बड्या नेत्याची उघडपणे नाराजी

Government officers : भाजपचे नेते आणि माजी केंद्रीय मंत्री विजय गोयल यांनी आपल्यास सरकारच्या कार्यक्षमतेवर प्रश्न उपस्थित केले आहेत. अधिकाऱ्यांकडून काम करून घेण्यासाठी आमदार-खासदारांना गल्लीत, रस्त्यांवर धक्के खावे लागत असल्याची नाराजी त्यांनी जाहीरपणे व्यक्त केली आहे.

विजय गोयल यांनी सोशल मीडियात एक पोस्ट करत दिल्ली सरकारमधील अधिकाऱ्यांवर प्रश्न उपस्थित केले आहेत. विविध पायाभूत सुविधांशी संबंधित मुद्दे त्यांनी उपस्थित केले आहेत. एकप्रकारे ढिम्म प्रशासनावर निशाणा साधताना त्यांनी सरकारलाही धारेवर धरल्याची चर्चा राजकीय वर्तुळात सुरू आहे.

विजय गोयल यांनी पोस्टमध्ये म्हटले आहे की, दिल्ली महानगरपालिका आणि सरकारी अधिकारी काम करत नाहीत. त्यांच्याकडून कामे करून घेण्यासाठी खासदार, आमदार तसेच नगरसेवकांना गल्लीबोळात, रस्त्यांवर धक्के खात फिरावे लागत आहे. सर्वसामान्य जनतेची कोण दखल घेणार, असा थेट सवाल गोयल यांनी केला आहे.

एखाद्या ठिकाणचा कचरा उचलला तर फार मोठे काम करून घेतल्यासारखे वाटते. पण अधिकारी असताना कचरा साठतोच कसा, हा विचार कुणीच करत नाही. ओढे, रस्ते, वीज, पाणी, गटारे यासारख्या समस्यांसाठी लोकप्रतिनिधी अधिकाऱ्यांकडे गयावया करतात, तरीही कामे होत नाहीत, अशी खंत गोयल यांनी बोलून दाखविली आहे.

दरम्यान, विजय गोयल हे तीनवेळा लोकसभा आणि एकदा राज्यसभेचे सदस्य होते. अटलबिहारी वाजपेयी आणि नरेंद्र मोदी यांच्या सरकारमध्ये त्यांनी मंत्रीपदही भूषविले आहे. भाजपमध्ये अनेक महत्वाच्या संघटनात्मक पदांवरही त्यांनी काम केले आहे. त्यामुळे त्यांनी व्यक्त केलेल्या नाराजीला महत्व प्राप्त झाले आहे. दिल्लीत मागील अनेक वर्षांनंतर भाजपची सत्ता आली आहे.