Pahalgam Attack : आठ दिवसांपूर्वीच लग्न, पत्नीसमोरच दहशतवाद्यांनी लेफ्टनंट विनयला घातल्या गोळ्या!

Pahalgam Attack News : पहलगामध्ये झालेल्या दहशतवादी हल्ल्यात 28 पर्यटकांना आपला जीव गमवावा लागला. या हल्ल्यामध्ये पतीच्या मृतदेहापाशी बसलेल्या तरुणीचा फोटो सोशल मीडियावर व्हायरल झाला होता. हा मृतदेह नौदलातील लेफ्टनंट विनय नरवाल यांचा होता. त्यांचा आठ दिवसांपूर्वीच हिमांशी यांच्यासोबत विवाह झाला होता. हिमांशी यांच्यासमोरच दहशतवाद्यांनी विनय यांना गोळ्या घातल्या.

विनय हा मागील तीन वर्षांपूर्वी नौदलात भरती झाला होता. सध्या त्याची ड्यूटी केरळमधील कोची येथे होती. विनय हे हरियाणातील करनालचे रहिवाशी होता. 16 एप्रिलला त्यांचा हिमांशी यांच्यासोबत विवाह झाला होता. 21 एप्रिलला हिमांशी आणि विनय हे काश्मीरला फिरण्यासाठी आले होते. हल्ल्यानंतर हिमांश यांचा व्हिडिओ देखील समोर आला आहे.

व्हिडिओमध्ये हिमांशी सागंत आहेत की, "मी माझ्या नवऱ्यासोबत भेलपुरी खात होते. तेथे एक व्यक्ती आला आणि म्हणाला हा मुसलमान नाहीये आणि त्यानंतर माझ्या नवऱ्यावर गोळी झाडली. दरम्यान, विनयच्या कुटुंबीयांना माहिती मिळताच मंगळवारी संध्याकाळी ते काश्मीरला रवाना झाले.

पंतप्रधान मोदींनी घेतली बैठक

दहशतवादी हल्ल्यानंतर पंतप्रधान नरेंद्र मोदी यांनी सौदी अरेबियातील आपला दौरा आटोपता घेत आज दिल्लीमध्ये दाखल झाले. पंतप्रधान नरेंद्र मोदी यांनी विमानतळावरच राष्ट्री सुरक्षा सल्लागार अजित डोवल आणि विदेशमंत्री एस जयशंकर यांच्यासोबत बैठक घेतली. पंतप्रधान मोदींनी ट्विट करत या हल्ल्यात सहभागी असणाऱ्यांना सोडणार नसल्याचा इशारा दिला होता.