Mahua Moitra: तृणमूलच्या २० बंडखोर खासदारांमध्ये युसुफ पठाणचाही समावेश! महुआ मोईत्रांनी सुनावलं; म्हणाल्या, आंतरराष्ट्रीय क्रिकेट खेळताना...

Mahua Moitra: ममता बॅनर्जी यांनी पश्चिम बंगालमधील सत्ता गमावल्यानंतर तृणमूल काँग्रेसमधील आमदार-खासदार सैरभर झाले आहेत. त्यातून त्यांनी ममतांविरोधात बंड पुकारलं असून पक्षामध्ये उभी फूट पडली आहे. पक्षाचे ८० पैकी ६० आमदार फुटल्यानंतर आता २८ पैकी २० खासदारही फुटले आहेत. आमदारांप्रमाणं खासदारांनीही लोकसभेत वेगळा गट स्थापन केला. या २० खासदारांमध्ये माजी क्रिकेटर युसूफ पठाणचाही समावेश आहे. याच युसुफ पठाण यांना आता ममतांशी एकनिष्ठ असलेल्या महुआ मोईत्रा यांनी सुनावलं आहे.

महुआ मोईत्रा यांनी बहरामपूरचे खासदार आणि माजी क्रिकेटर युसुफ पठाण यांनी बंडखोर गटाची बाजू घेत त्यांच्यासोबत जाण्याचा मार्ग स्विकारल्यानं आगपाखड केली आहे. मोईत्रा म्हणाल्या, केंद्रीय गृहमंत्र्यांनी समन्स पाठवल्यानं युसुफ पठाण तातडीनं दिल्लीला गेले. पण जरातरी धैर्य दाखवायचं असा सल्ला देतानाच पठाण यांना त्यांनी जुन्या दिवसांची आठवण करुन दिली. जेव्हा युसुफ पठाण हे आंतरराष्ट्रीय क्रिकेटमध्ये भारताचं प्रतिनिधीत्व करत होते. तुमच्या जिल्ह्यातील जनतेनं तुम्हाला मोठ्या फरकानं जिंकून देण्यासाठी मतदान केलं. त्यामुळं भाजपच्या वळचणीला जाताना थोडीतरी लाज बाळगायची होती, आपला कणा ताठ ठेवायचा होता.

त्याचबरोबर, महुआ मोईत्रा यांनी बंडखोरीच्या घटनानंतर तृणमूलच्या बंडखोर आमदारांवरही जोरदार टीका केली होती. बंड करणारे हे लोक पूर्णपणे बिनकमाचे असल्याचं त्यांनी म्हटलं होतं, तसंच हे लोक निव्वळ ममता बॅनर्जी यांच्या करिश्म्यावरच जगत होते, असा घणाघातही त्यांनी केला.

दरम्यान, महुआ मोईत्रा यांच्यासह सयानी घोष, अभिषेक बॅनर्जी हे सध्या ममता बॅनर्जी यांच्यासोबत काय आहेत. पण आता तृणमूल काँग्रेसच्या संसदेतील आणि विधानसभेतील दोन तृतीयांश सदस्यांनी बंडखोरी केल्यामुळं आणि आपला वेगळा गट स्थापन केल्यानंतर आता ते पक्षावर दावाही करु शकतात. त्यामुळं अल्पसंख्यांक झालेल्या ममतांना आता पक्षाचं चित्र आणि नाव दोन्ही गमवावं लागू शकतं.