Kolhapur World Record: कोल्हापूरात घडला विश्वविक्रम! संविधान प्रास्ताविकेचं तब्बल 19 भाषांमध्ये गायन; कसा होता सोहळा?

Kolhapur World Record: भारतीय राज्यघटना ही प्रत्येक भारतीयाच्या जगण्याचं प्रतिबिंब आहे. या राज्यघटनेच्या प्रस्ताविकेत याची झलक आपल्याला पाहायला मिळते. याच प्रस्ताविकेचं भारतातील तब्बल १९ भाषांमध्ये गायन करुन कोल्हापूरात विश्वविक्रम प्रस्थापित केला आहे. इथल्या ऐतिहासिक दसरा चौकात हा कार्यक्रम पार पडला. यामध्ये तब्बल १६०० जणांनी सहभाग नोंदवला. यावेळी प्रमुख पाहुणे म्हणून केंद्रीय राज्यमंत्री रामदास आठवले, पालकमंत्री प्रकाश आबिटकर, राज्य नियोजन मंडळाचे कार्यकारी अध्यक्ष राजेश क्षीरसागर यांच्यासह अन्य मान्यवर उपस्थित होते.

भारतीय संविधान आणि आजच्या लोकशाही दिनाच्या अमृत महोत्सवी वर्षानिमित्त काल सायंकाळी कोल्हापुरात 'हम भारत के लोग' या संविधान गीताचा विश्वविक्रम करण्यात आला. कोल्हापुरातील गायक आणि संगीतकार कबीर नाईकनवरे यांच्या संकल्पनेतून हा उपक्रम राबविण्यात आला. या कार्यक्रमाला केंद्रीय सामाजिक न्याय राज्यमंत्री रामदास आठवले यांची प्रमुख उपस्थिती होती. दसरा चौक इथं झालेल्या या विश्वविक्रमात १६०० जण सहभागी झाले होते.

19 भाषांमध्ये प्रास्ताविकेचं गायन

दरम्यान, मराठी, आसामी, इंग्रजी, संस्कृत, मैथिली, भोजपुरी, ओडिशा, पंजाबी, सिंधी, राजस्थानी, बंगाली, कोकणी, गुजराती, पाली, कन्नड, तेलगू, उर्दू, नेपाळी, हिंदी भाषेत संविधान प्रास्ताविकेचं गायनाद्वारे सादरीकरण झालं.