Atrocity Threat: थेट तहसीलदारांनाच ॲट्रॉसिटीचा गुन्हा दाखल करण्याची धमकी; कागलमध्ये एकावर गुन्हा दाखल

Kagal Tehsildar Threat Case: कार्यालयीन कामकाजात अडथळा निर्माण करून तहसीलदारांना ॲट्रॉसिटीची धमकी दिल्याचा प्रकार कागल तालुक्यामध्ये घडला आहे. धमकी दिल्याप्रकरणी कागल पोलिसांनी आज पिंपळगाव खुर्द (ता. कागल) येथील राज रघुनाथ कांबळे (वय ३५) याच्याविरोधात गुन्हा नोंद केला. हा प्रकार गुरुवारी सायंकाळी कागल तहसील कार्यालयात झाला घडला.

याबाबत पोलिसांनी दिलेली अधिक माहिती अशी की, तहसीलदार अमरदीप वाकडे आणि कांबळे यांच्यात प्रतिज्ञापत्राच्या कामावरून वाद झाला. यातून कांबळे यांनी अर्वाच्य भाषा वापरून कार्यालयीन कामकाजात अडथळा आणला आणि तहसीलदार अमरदीप वाकडे यांना ॲट्रॉसिटीचा गुन्हा दाखल करण्याची धमकी दिली.

प्रतिज्ञापत्रांचे काम का झाले नाही, असे म्हणत कांबळे याने तहसीलदारांच्या कक्षात गोंधळ घातला. कागल तालुक्यात कशी नोकरी करता ते मला बघायचे आहे. मी काय आहे, हे दोन दिवसांत दाखवतो. मी सांगेल त्यांची प्रतिज्ञापत्रे आणि दाखल्यांची कामे केली पाहिजेत. अन्यथा ॲट्रॉसिटी कायद्याखाली तक्रार करतो, अशी धमकी कांबळे याने दिल्याचे फिर्यादीत नमूद आहे.

या प्रकरणात सहायक फौजदार प्रशांत माने तपास करत आहेत. या प्रकरणी कडक कारवाई व्हावी आणि कार्यालयांमधील दलालांचा वावर रोखावा, अशी मागणी निवासी नायब तहसीलदार राजेंद्र यादव यांच्यासह अधिकारी आणि कर्मचाऱ्यांनी जिल्हाधिकाऱ्यांकडे केली आहे. त्यात म्हटले आहे, की कार्यालय परिसरात दलालांचा वावर वाढला आहे. कार्यालयातील व्हिडिओ करून तो माध्यमांमध्ये प्रसारित करण्याच्या धमक्या दिल्या जात आहेत. त्यामुळे कार्यालयाची बदनामी होत आहे. कागल तालुका महसूल सेवक संघटनेने या घटनेचा निषेध करत कारवाईची मागणी केली आहे.