Ujjwal Nikam : मोठी बातमी! अ‍ॅड. उज्वल निकम यांची खासदारपदी निवड, मीनाक्षी जैन, हर्षवर्धन श्रृंगला यांनाही संधी

Ujjwal Nikam News : ज्येष्ठ सरकारी वकील उज्वल निकम यांची राष्ट्रपती नामनिर्देशित खासदार म्हणून निवड करण्यात आली आहे. 2024 मध्ये लोकसभा निवडणुकीपूर्वी त्यांनी भाजपमध्ये प्रवेश करत निवडणूक लढवली होती. मात्र, काँग्रेस उमेदवार वर्षा गायकवाड यांच्याकडून त्यांना पराभव स्वीकारावा लागला होता. आता राज्यसभेत राष्ट्रपती कोट्यातून त्यांची खासदारपदी निवड झाली आहे.

1993 च्या मुंबई बॉम्बस्फोट खटल्यासह अनेक महत्त्वाच्या केसेस मध्ये सरकारी वकील म्हणून उज्वल निकम यांनी काम पाहिले होते. गुलशन कुमार हत्याकांड, प्रमोद महाजन हत्या, 2008 मध्ये मुंबईवर झालेला हल्ला, कोपर्डी बलात्कार या हायप्रोफाईल केसमध्ये त्यांनी सरकारी वकील म्हणून काम पाहिले आहे. संतोष देशमुख हत्या प्रकरणात देखील सरकारी विशेष सरकरी वकील म्हणून ते काम पाहत आहेत.

चार जणांना खासदारपदी निवड

उज्वल निकम यांच्यासोबत हर्षवर्धन श्रृंगला , डॉ. मीनाक्षी जैन, सी. सदानंदन मास्टर यांची देखील राष्ट्रपती नामनिर्देशित खासदार म्हणून नियुक्ती करण्यात आली आहे. हर्षवर्धन श्रृंगला हे माजी परराष्ट्र सचिव आहेत. तर, सदानंद मास्टर हे केरळमधील ज्येष्ठ समाजसेवक शिक्षण तज्ज्ञ आहेत. तर, मीनाझी जैन हा प्रसिद्ध इतिहासकार आहेत.

उज्वल निकम यांच्या घरात काँग्रेसचा वारसा

लोकसभा निवडणूक भाजपकडून लढलेल्या ॲड.निकम यांचे मूळ कॉंग्रेसचे घराणे आहे. त्यांचे वडील बॅरिस्टर देवराम निकम हे चोपडा तालुक्यातून कॉंग्रेसचे आमदार होते. तसेच त्यांचे भाऊ दिलीप निकम व भावजय शैलजा निकम या कॉंग्रेसच्या जिल्हा परिषद सदस्या होत्या. दरम्यान, उज्वल निकम यांचे मूळगाव जळगाव जिल्ह्यातील चोपडा तालुक्यातील माचले गावचे आहेत. तेथेच त्यांचे प्राथमिक, माध्यमिक शिक्षण झाले.