मनसुख हिरेन नंतर आता माझ्या हत्येचा ठाकरे सरकारचा प्लॅन

मुंबई : उद्धव ठाकरे, संजय राऊत, अनिल परब, पाटणकर यांचे घोटाळे बाहेर काढत असल्यामुळे किरीट सोमय्याला गप्प बसवायचे प्रयत्न केले जात आहेत. (Kirit Somaiya) मनसुख हिरेनची जशी हत्या झाली, तशीच माझी देखील करण्याचा उद्धव ठाकरे (Uddhav Thackeray) सरकारचा प्लॅन असल्याचा गंभीर आरोप भाजपचे नेते किरीट सोमय्या यांनी व्हिडिओच्या माध्यमातून केला आहे.(Bjp) पण ठाकरे सरकारचे सगळे घोटाळे बाहेर काढल्याशिवाय मी स्वस्थ बसणार नाही, असा इशारा देखील सोमय्या यांनी दिला आहे.

पुणे महापालिकेतील भ्रष्टाचाराचा भांडाफोड करण्यासाठी गेलेल्या किरीट सोमय्या यांच्यावर शिवसैनिकांनी हल्ला केला. या हल्यात ते खाली पडले आणि त्यांच्या माकडहाडाला जबर मार बसला. त्यांना रुग्णालयात भरती व्हावे लागले होते. यावरून भाजपने महाविकास आघाडी सरकारवर टीकेची झोड उठवली होती.

देवेंद्र फडणवीस, चंद्रकांत पाटील यांच्यासह भाजपच्या नेत्यांनी हा भ्याड हल्ला असून आम्ही शांत बसणार नाही, म्हणत रान पेटवले. सोमय्या यांनी थेट मुख्यमंत्री उद्धव ठाकरे यांच्या सांगण्यावरूनच हा हल्ला करण्यात आल्याचा आरोप केला होता. आज पुन्हा एक व्हिडिओ जारी करत सोमय्या यांनी मनसुख हिरेन हत्येनंतर आता आपली हत्या करण्याचा ठाकरे सरकारचा प्लॅन असल्याचा दावा केला आहे.

पुण्यात माझ्यावर लाठ्या, काठ्या, दगड घेऊन हल्ला करण्यात आला, तेव्हा पुणे पोलिस शांत बसले होते. जे फुटेज समोर आले आहे, यातून ते स्पष्ट होते. केवळ केंद्र सरकारच्या झेड सेक्युरिटीमुळे मी वाचलो. संजय राऊत, उद्धव ठाकरे, अनिल परब, पाटणकर यांचे घोटाळे बाहेर येत आहेत, म्हणून किरीट सोमय्या यांना गप्प बसवायचे आहे.

पण मी गप्प बसणार नाही, मी राज्यपालांना भेटणार आहे, त्यानंतर गुरुवारी केंद्रीय गृहमंत्रालयाला रिपोर्ट देणार आणि ठाकरे सरकारचे घोटाळे काढूनच गप्प बसणार, असा इशारा देखील सोमय्या यांनी दिला आहे.