Manikrao Kokate Video Viral : कृषीमंत्री कोकाटेंचा रमी खेळतानाचा व्हिडिओ व्हायरल, रोहित पवारांच्या ट्विटने खळबळ!

Manikrao Kokate News : कृषीमंत्री माणिकराव कोकाटे यांचा रमी खेळताचा व्हिडिओ समोर आल्याने मोठी खळबळ उडाली आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी कोकाटे यांचा रमी खेळतानाचा व्हिडिओ ट्विट केला आहे. कधी शेतीवर या महाराज, खेळ थांबा कर्जमाफीद्या, असे ट्विटमध्ये हॅशटॅग वापरत कोकाटेंना टोला लगावला आहे.

'सरकारनामा' या व्हिडिओची पुष्टी करत नाही. दरम्यान, रोहित पवारांनी म्हटले आहे की, 'सत्तेतल्या राष्ट्रवादी गटाला भाजपला विचारल्याशिवाय काहीच करता येत नाही म्हणूनच शेतीचे असंख्य प्रश्न प्रलंबित असताना, राज्यात रोज ८ शेतकरी आत्महत्या करत असताना सुद्धा काही कामच नसल्याने कृषिमंत्र्यांवर रमी खेळण्याची वेळ येत असावी.'

'रस्ता भरकटलेल्या या मंत्र्यांना आणि सरकारला पिकविमा-कर्जमाफी-भावांतर ची मागणी करणाऱ्या शेतकऱ्यांची “कभी गरीब किसानो कीं खेतीपर भी आओ ना महाराज” ही आर्त हाक ऐकू येईल का?' असा प्रश्न देखील रोहित पवार यांनी विचारला आहे.

महायुतीचे मंत्री, आमदार अडचणीत

पावसाळी अधिवेशनाच्या काळात मंत्री संजय शिरसाट यांचा एक व्हिडिओ समोर आला होता. त्यामध्ये ते बनियावर बसलेले दिसून येत आहेत तर त्यांच्या खोलीत पैशांची बॅग भरून ठेवलेली दिसत आहे. या व्हिडिओनंतर शिरसाट यांच्यावर जोरदार टीका करण्यात येत होती. त्याआधी शिवसेनेचे आमदार संजय गायकवाड यांनी आमदार निवासातील कॅन्टीमध्ये कॅन्टीनचालकाला मारहाण केल्याचा व्हिडिओ समोर आला होता. आणि आता कृषीमंत्रीच फोनवर रमी गेम खेळताना दिसत असल्याचा व्हिडिओ समोर आला आहे. त्यामुळे आमदार आणि मंत्र्यांमुळे महायुतीचे सरकार अडचणीत येत असल्याची चर्चा आहे.