NCP News : अजितदादांची 40 जणांची फौज महाराष्ट्र पिंजून काढणार; चाकणकरांसह मुंडे, नवाब मलिकांचीही तोफ धडाडणार

NCP News : उपमुख्यमंत्री अजित पवार यांच्या नेतृत्वातील राष्ट्रवादी काँग्रेसने नगरपरिषद आणि नगरपंचायत निवडणुकीसाठी 40 स्टार प्रचारकांची यादी जाहीर केली आहे. यात स्वतः अजित पवार, सुनील तटकरे यांच्यासह पक्षाचे मंत्री आणि आजी-माजी आमदारांचा समावेश आहे. मात्र या यादील काही नावांनी अनेकांच्या भुवया उंचावल्या आहेत.

प्रदेशाध्यक्ष सुनील तटकरे यांनी जाहीर केलेल्या यादीत, अजित पवार, स्वतः तटकरे, प्रफुल पटेल, मंत्री हसन मुश्रीफ,नरहरी झिरवाळ, बाबासाहेब पाटील, दत्तात्रय भरणे, आदिती तटकरे, माणिकराव कोकाटे, मकरंद पाटील, अण्णा बनसोडे, इंद्रनील नाईक, धनंजय मुंडे, अनिल पाटील, प्रताप पाटील चिखलीकर, सयाजी शिंदे, समीर भुजबळ, सना मलीक, इद्रीस नायकवडी, झिशान सिद्दकी यांच्यासह इतरही आजी-माजी आमदार आणि पदाधिकाऱ्यांचा समावेश आहे.

यातील महिला आयोगाच्या अध्यक्षा रुपाली चाकणकर, संतोष देशमुख हत्या प्रकरणात राजीनामा द्यावा लागलेले धनंजय मुंडे, 2021 मध्ये भाजप आणि तत्कालीन विरोधी पक्षनेते देवेंद्र फडणवीस यांनी दहशतवाद्यांशी संबंध असल्याचे आरोप केलेले नवाब मलिक यांचा समावेश आहे. शिवाय नुकतेच प्रवक्तेपदावरून हटवलेल्या अमोल मिटकरी यांचेही नाव आहे.

रुपाली चाकणकर या महिला आयोगाच्या अध्यक्षा असूनही जाहीरपणे पक्षाचा प्रचार कसा करणार? ज्या नवाब मलिक यांच्यावर आरोप झालेले तेच महायुतीचा आणि पर्यायाने भाजपचाही प्रचार करणार का? असा सवाल विचारला जात आहे. शिवाय धनंजय मुंडे यांचा स्टार प्रचारकांच्या यादीत समावेश करून त्यांना पुन्हा राजकारणात अॅक्टिव्ह करण्याचे नियोजन असल्याचेही सांगितले जाते.