Amravati ayan ahmed video scandal : 'लव्ह गुरू'च्या टिप्स वापरून मुलींना अडकवत होता जाळ्यात; अमरावती प्रकरणातील धक्कादायक खुलासे

अमरावती जिल्ह्यातील परतवाडा परिसरात उघडकीस आलेल्या मुलींच्या लैंगिक शोषण प्रकरणाने संपूर्ण भाग हादरून गेला आहे. या प्रकरणाच्या तपासाला आता वेग आला असून विशेष तपास पथकाकडून धक्कादायक माहिती समोर येत आहे. मुख्य आरोपी अयान अहमद याने नियोजनपूर्वक तरुणींना आपल्या जाळ्यात ओढून त्यांचे शोषण केल्याचे स्पष्ट झाले आहे. विशेष म्हणजे, यासाठी त्याने एका तथाकथित ‘लव्ह गुरू’ची मदत घेतल्याचा मोठा खुलासा झाला आहे.

तपासात समोर आलेल्या माहितीनुसार, अयानने आपल्या मित्र मानव सुगंधे यांच्या कठोरा रोडवरील भाड्याच्या फ्लॅटचा 7 ते 8 वेळा वापर केला होता. या ठिकाणीच काही मुलींना नेऊन त्यांच्यावर अत्याचार केल्याचा संशय आहे. पोलिसांनी या फ्लॅटच्या मालकाला चौकशीसाठी बोलावले असून, त्याला या प्रकाराची माहिती होती का याची सखोल चौकशी सुरू आहे.

अयान मुलींशी संपर्क साधण्यासाठी एक वेगळीच पद्धत वापरत होता. तो थेट “तू तीच आहेस ना जी मला तिथे भेटली होतीस?” असा संभ्रम निर्माण करणारा प्रश्न विचारून संवाद सुरू करत असे. या प्रश्नामुळे समोरची मुलगी गोंधळून जात असे आणि स्वतःहून अधिक माहिती देत असे. याच संधीचा फायदा घेत तो हळूहळू तिच्याशी जवळीक वाढवत असे.

तपासात असेही उघड झाले आहे की, अयानला दोन वर्षांपूर्वी एका तरुणाने संवाद कौशल्य आणि मुलींना कसे आकर्षित करायचे याचे प्रशिक्षण दिले होते. हाच व्यक्ती ‘लव्ह गुरू’ म्हणून ओळखला जात असून, आता पोलिस त्याचा शोध घेत आहेत.

या संपूर्ण प्रकरणामुळे सोशल मीडियाचा गैरवापर किती धोकादायक ठरू शकतो, हे पुन्हा एकदा समोर आले आहे. पोलिसांकडून पुढील तपास सुरू असून, आणखी धक्कादायक बाबी उघड होण्याची शक्यता व्यक्त केली जात आहे.