Vidhan Parishad Maharashtra politics : विधान परिषदेत ठाकरे गटाची नवी खेळी; उद्धव ठाकरे यांच्या जागी 'या' दोन नेत्यांची नावे आघाडीवर!

Shivsena Thackeray Group : विधान परिषद निवडणुकीच्या पार्श्वभूमीवर राजकीय घडामोडींना वेग आला आहे. 12 मे रोजी विधान परिषदेसाठी मतदान होणार आहे. रिक्त असलेल्या 9 जागांपैकी एक जागा महाविकास आघाडीच्या वाट्याला आली असून, या जागेसाठी ठाकरे गटात जोरदार चर्चा सुरू आहे. विशेष म्हणजे, माजी मुख्यमंत्री उद्धव ठाकरे यांच्या जागी कोणाला संधी दिली जाणार याकडे सर्वांचे लक्ष लागले आहे.

या एका जागेसाठी सध्या दोन प्रमुख नावे आघाडीवर असल्याचे दिसते. माजी विरोधी पक्षनेते अंबादास दानवे आणि पक्षाच्या उपनेत्या सुषमा अंधारे यांची नावे सर्वाधिक चर्चेत आहेत. दोघांनीही आपल्या आक्रमक भूमिकेमुळे आणि सातत्याने सरकारवर टीका केल्यामुळे पक्षात वेगळी ओळख निर्माण केली आहे.

अंमबादास दानवे नुकतेच विधान परिषदेतून निवृत्त झाले असून, विरोधी पक्षनेते म्हणून त्यांनी सरकारविरोधात जोरदार आवाज उठवला होता. विविध भ्रष्टाचाराच्या मुद्द्यांवर त्यांनी सरकारला धारेवर धरले होते. त्यामुळे त्यांची प्रतिमा आक्रमक आणि अभ्यासू नेते अशी तयार झाली आहे.

दुसरीकडे, सुषमा अंधारे यांनीही अनेक संवेदनशील प्रकरणांमध्ये सरकारला अडचणीत आणले आहे. पुणे आणि सातारा येथील ड्रग्ज प्रकरण, महिला अत्याचार आणि इतर मुद्द्यांवर त्यांनी ठाम भूमिका घेतली होती. त्यामुळे त्यांचे नावही या शर्यतीत मजबूत मानले जात आहे.

दरम्यान, उद्धव ठाकरे पुन्हा विधान परिषदेत जाणार का याबाबत अद्याप स्पष्टता नाही. त्यांनी निवडणूक न लढवण्याचा संकेत यापूर्वी दिला होता. मात्र, जर ते उमेदवार असतील तर काँग्रेसकडून त्यांना पाठिंबा मिळू शकतो, अशी चर्चा आहे.

याशिवाय ठाकरे गटातील इतर काही नेते देखील इच्छुक आहेत. यामध्ये माजी खासदार राजन विचारे, विनायक राऊत, माजी आमदार वैभव नाईक आणि पक्षाचे सचिव सुरज चव्हाण यांची नावेही चर्चेत आहेत. एकूणच, या एका जागेसाठी अनेक इच्छुक असल्याने पक्षांतर्गत स्पर्धा वाढली आहे.

उद्धव ठाकरे स्वतः निवडणूक लढवतात की इतर कोणाला संधी देतात, यावर पुढील राजकीय समीकरणे ठरणार आहेत. त्यामुळे विधान परिषद निवडणुकीची उत्सुकता आणखी वाढली आहे.