Ashok Kharat expose : मोठा खुलासा! जगासमोर आज येणार अशोक खरातचा विकृत चेहरा; तेजस्वी सातपुते उलगडणार मोठे गुपित!

नाशिकमधील भोंदू बाबा अशोक खरात प्रकरणात आता मोठी घडामोड समोर येत आहे. या प्रकरणाच्या तपासाला वेग आला असून, खरातचा खरा आणि धक्कादायक चेहरा आज उघड होण्याची शक्यता आहे. तपासादरम्यान स्वतः अशोक खरातने केलेल्या कबुलीजबाबामुळे अनेक धक्कादायक बाबी समोर आल्या आहेत, अशी माहिती सुत्रांकडून मिळत आहे.

महिलांना कशा प्रकारे फसवलं जात होतं, त्यांना मानसिकदृष्ट्या कसं जखडून ठेवलं जात होतं, तसेच त्यांच्यावर अत्याचार करण्यासाठी त्यांना कसं तयार केलं जात होतं, याबाबत गंभीर माहिती मिळाल्याचं सांगितलं जात आहे.

या संपूर्ण प्रकरणावर आज सायंकाळी 5 वाजता विशेष तपास पथकाच्या प्रमुख तेजस्वि सातपुते पत्रकार परिषद घेणार आहेत. या परिषदेत तपासातील महत्त्वाचे मुद्दे, पुरावे आणि नव्याने समोर आलेले खुलासे सविस्तर मांडले जाण्याची शक्यता आहे. त्यामुळे संपूर्ण राज्याचं लक्ष या पत्रकार परिषदेकडे लागलं आहे.

अशोक खरात विरोधात आतापर्यंत एकूण 12 गुन्हे नोंदवले गेले असून, त्यापैकी 8 गुन्हे महिलांच्या लैंगिक शोषणाशी संबंधित आहेत. या प्रकरणातील गंभीरता लक्षात घेता पोलीस यंत्रणा अधिक सतर्क झाली आहे. तपासादरम्यान मिळालेल्या सीसीटीव्ही फुटेजमधूनही काही महत्त्वाचे पुरावे समोर आले आहेत, ज्यातून महिलांना कसं जाळ्यात ओढलं जात होतं याचा उलगडा झाला आहे.

तसेच, खरातने स्वतः कबूल केलं आहे की तो महिलांशी आधी विश्वासाचं नातं निर्माण करायचा आणि नंतर त्याचा गैरफायदा घ्यायचा. या पद्धतीने अनेक महिलांना फसवल्याचा आरोप त्याच्यावर आहे. त्यामुळे या प्रकरणाने समाजात मोठी खळबळ उडाली आहे.

आज होणाऱ्या पत्रकार परिषदेत तेजस्वि सातपुते नेमकी कोणती माहिती उघड करणार, कोणते नवे पुरावे सादर होणार आणि या प्रकरणाला कोणतं वळण मिळणार, याकडे सर्वांचं लक्ष लागलं आहे. या खुलास्यांनंतर या प्रकरणात आणखी मोठे बदल होण्याची शक्यता व्यक्त केली जात आहे.