Ashram School News: सरकारचा मोठा निर्णय! आश्रमशाळेतील शिक्षकांना वरिष्ठ वेतनश्रेणी अन् निवडश्रेणी लागू; कुणाला होणार फायदा?

1. 12 वर्षांची सेवा पूर्ण केलेल्या शिक्षकांना वरिष्ठ वेतनश्रेणीचा लाभ

2. 24 वर्षे सेवा पूर्ण करणाऱ्या शिक्षकांना निवडश्रेणी मंजूर

3. राज्य सरकारच्या निर्णयामुळे हजारो शिक्षकांना आर्थिक फायदा होणार

Ashram School News: राज्यातील खासगी अनुदानित उच्च माध्यमिक आश्रमशाळांमध्ये कार्यरत शिक्षकांसाठी राज्य सरकारने महत्त्वाचा निर्णय घेतला आहे. अनेक वर्षांपासून प्रलंबित असलेली मागणी मान्य करत शासनाने या शिक्षकांना वरिष्ठ वेतनश्रेणी आणि निवडश्रेणीचा लाभ देण्यास मंजुरी दिली आहे. याबाबतचा सरकराने अध्यादेश काढला आहे. या निर्णयामुळे आश्रम शाळांतील शिक्षकांमध्ये आनंदाचे वातावरण आहे.

शासनाच्या निर्णयानुसार, राज्यातील खासगी अनुदानित उच्च माध्यमिक आश्रमशाळांमधील पात्र शिक्षकांना सेवाकालाच्या निकषांनुसार वरिष्ठ वेतनश्रेणी तसेच निवडश्रेणीचा लाभ मिळणार आहे. यामध्ये 12 वर्षांच्या सेवेनंतर वरिष्ठ वेतनश्रेणी आणि 24 वर्षांच्या सेवेनंतर निवडश्रेणी लागू होणार आहे.

आदिवासी विकास विभागाच्या अखत्यारीतील आश्रमशाळांमध्ये कार्यरत शिक्षकांकडून ही मागणी दीर्घकाळ करण्यात येत होती. अनेक शिक्षकांनी आवश्यक सेवाकाल पूर्ण करूनही त्यांना संबंधित लाभ मिळत नसल्याने नाराजी व्यक्त होत होती. अखेर राज्य सरकारने याबाबत सकारात्मक निर्णय घेतल्याने शिक्षकांच्या आर्थिक लाभाचा मार्ग मोकळा झाला आहे.

या निर्णयामुळे राज्यभरातील उच्च माध्यमिक आश्रमशाळांमधील शिक्षकांना आर्थिकदृष्ट्या मोठा फायदा होणार असून, प्रलंबित मागणी पूर्ण झाल्याने शिक्षक संघटनांनीही समाधान व्यक्त केले आहे. शासनाच्या या निर्णयामुळे आश्रमशाळांमधील शिक्षकांना इतर शासकीय आणि अनुदानित संस्थांतील शिक्षकांप्रमाणेच वेतनश्रेणीचे लाभ मिळणार आहेत.