BJP Politics : विधानसभा निवडणुकीत राणा नको, भाजप पदाधिकारी आक्रमक

Badnera Assembly Constituency News : लोकसभा निवडणुकीत नवनीत राणा यांना स्थानिक भाजप नेत्यांनी विरोध केला होता. तरीदेखील त्यांना तिकीट देण्यात आले. मात्र, स्थानिक नेत्यांच्या नाराजीचा फटका नवनीत राणा यांना बसला.

त्यांना काँग्रेस उमेदवाराकडून पराभव स्वीकारावा लागला. बडनेरा विधानसभा मतदारसंघातून रवी राणा तयारी करत आहेत. मात्र, हा मतदारसंघ महायुतीने भाजपला सोडावा आणि स्थानिक भाजप उमेदवाराला उमेदवारी द्यावी, अशी मागणी भाजप पदाधिकारी करत आहेत.

अमरावती भाजपच्या जिल्हा बैठकीत रवी राणा यांच्या उमेदवारीला विरोध करण्यात आला. महायुतीमध्ये बडनेराची जागा भाजपला मिळायली हवी,असा निर्णय या बैठकीत झाल्याचे वृत्त 'साम टिव्ही'ने सुत्रांच्या हवाल्याने दिले आहे.

रवी राणा यांचे भाजपातील BJP वरिष्ठ नेत्यांची चांगले संबंध आहेत. नवनीत राणा यांनी पराभूत झाल्यानंतर त्या भाजपसोबत कायम राहणार असल्याचे स्पष्ट केले होते. मात्र, रवी राणा यांची 'युवा स्वाभिमान पार्टी' आहे.

याच पक्षाकडून ते विधानसभा निवडणुकीत उतरतील. सध्या ते बडनेराचे विद्यमान आमदार आहेत. त्यामुळे महायुतीचा घटक म्हणून ही जागा आपल्याला सोडावी, अशी मागणी रवी राणा यांच्याकडून करण्यात येणार आहे.

रवी राणा Ravi Rana यांचे वरिष्ठ भाजप नेत्यांशी चांगले संबंध असले तरी स्थानिक नेत्यांशी त्यांचे सलोख्याचे संबंध नाहीत. त्यामुळे वरिष्ठ भाजपशी जवळीक आणि खालच्या भाजप कार्यकर्त्यांवर वरवंटा फिरवणारे रवी राणा नकोच. विधानसभा निवडणुकीत रवी राणा यांना उमेदवारी देऊ नका याबाबत वरिष्ठ भाजपच्या वरिष्ठ श्रेष्ठींना सांगणार असल्याचे स्थानिक भाजप नेते म्हणत आहे.

फडणवीस निर्णय घेणार?

अमरावती जिल्ह्यातील भाजप नेत्यांनी रवी राणा यांना कडाडून विरोध केला आहे. राणा नकोच, अशी भूमिका स्थानिक नेते घेत आहेत. मात्र, या विषयी अंतिम निर्णय उपमुख्यमंत्री देवेंद्र फडणवीस हे घेणार असल्याची शक्यता आहे. देवेंद्र फडणवीस काय निर्णय घेतात याकडे भाजप कार्यकर्त्यांचे लक्ष लागले आहे.