Devendra Fadnavis : '...तर मीसुद्धा बिनडोक ठरेन'; फडणवीसांचा टोला, नेमकं प्रकरण काय?

Maharashtra Politics : काँग्रेस प्रदेशाध्यक्ष हर्षवर्धन सपकाळ यांनी मुख्यमंत्री देवेंद्र फडणवीस यांच्यावर गडचिरोलीमधील लोखंड खाणीवर जहरी टीका केली होती. त्यावर प्रत्युत्तर देताना, मुख्यमंत्री फडणवीस यांनी जोरदार पलटवार केला आहे.

'कोणी बिनडोकपणे बोललं, अन् त्याला मी उत्तर दिलं तर, मी देखील बिनडोक ठरेल,' असा सणसणीत टोला मुख्यमंत्री फडणवीस यांनी लगावला आहे.

काँग्रेसचे (Congress) हर्षवर्धन सपकाळ यांनी मुख्यमंत्री देवेंद्र फडणवीस यांच्या आर्थिक धोरणांवर जोरदार टीका केली होती. मुख्यमंत्री फडणवीस गडचिरोलीमधील लोखंड काढून ते विदेशात पाठवत आहे. तेच लोखंड पुन्हा विदेशातून घ्यायचं. हा सर्व घाट शक्तिपीठ महामार्गासाठी सुरू आहे, असा गंभीर आरोप सपकाळ यांनी केला होता.

मुख्यमंत्री फडणवीस (Devendra Fadnavis) यांनी, 'यावर जोरदार पलटवार केला. कोणी माझ्या स्तरावर बोलले तर, मी उत्तर देईल. पण कोणी बिनडोकसारखे बोलत असेल आणि मी त्याला उत्तर दिले तर, मी सुद्धा बिनडोक ठरेल,' असे म्हटले.

भाजप महायुती सरकारने राज्याच्या अर्थसंकल्पात दोन लाखांपर्यंत कर्जमाफी जाहीर केली आहे. तसंच नियमित कर्ज भरणाऱ्यांना देखील अनुदान जाहीर केलं आहे. यावर विरोधकांनी फसवी कर्जमाफी, असा उल्लेख करत, किमान चार लाखापर्यंत काळानुसार कर्जमाफी हवी होती, असे म्हटलं. विरोधकांच्या या टीकेवर मुख्यमंत्री फडणवीस यांनी प्रतिक्रिया दिली.

यावर मुख्यमंत्री फडणवीस यांनी, गिरा तो टांग उपर, अशापद्धतीने विरोधकांचे सुरू आहे. जनता विरोधकांसोबत नाही. जनतेने स्थानिक स्वराज्य संस्थांच्या निवडणुकांमध्ये विरोधकांना जनतेने जमीन दाखवली आहे. आणि आम्ही निवडणुका जिंकल्यानंतर कर्जमाफी केली आहे. निवडणुका जिंकण्याकरीता कर्जमाफी केलेली नाही. विरोधकांनी कितीही आंदोलनं केली तरी, जनता त्यांच्यासोबत नाही, असे ठासून सांगितले.