Mahayuti : 'ऑपरेशन लोटसने' महायुतीत मोठा भूकंप; शिवसेनेच्या मंत्र्यांचा मंत्रिमंडळ बैठकीवर बहिष्कार; भाजपविरोधात उद्रेक

Mahayuti Controversy : स्थानिक स्वराज्य संस्था निवडणुकीच्या पार्श्वभूमीवर मागील काही दिवसांपासून भाजपमध्ये मोठ्या प्रमाणात नेत्यांचे घाऊक पक्षप्रवेश सुरु आहेत. यात अगदी मित्रपक्ष राष्ट्रवादी काँग्रेस आणि शिवसेनेतील नेत्यांनाही भाजपमध्ये प्रवेश दिले जात आहे. याच घाऊक पक्षप्रवेशाविरोधात शिवसेनेच्या मंत्र्यांनी आवाज उठवला आहे. उपमुख्यमंत्री एकनाथ शिंदे वगळता शिवसेनेच्या मंत्र्यांनी मंगळवारी (18 नोव्हेंबर) मंत्रिमंडळ बैठकीवर बहिष्कार घातल्याची माहिती आहे. बैठकीनंतर सर्व मंत्र्यांनी मुख्यमंत्री देवेंद्र फडणवीस यांची भेट घेतली.

महायुतीतील राष्ट्रवादी काँग्रेस आणि शिवसेनेतील नेते भाजपमध्ये प्रवेश करत आहेत. अशात मंगळवारी कल्याण-डोंबिवलीमध्ये शिवसेनेतील काही माजी नगरसेवकांनी प्रदेशाध्यक्ष रविंद्र चव्हाण यांच्या उपस्थितीमध्ये भाजपमध्ये प्रवेश केला. याच पक्षप्रवेशानंतर शिवसेनेमध्ये मोठ्या प्रमाणात नाराजी उफाळून आली. यानंतर शिवसेनेच्या मंत्र्यांनी थेट मंत्रिमंडळ बैठकीवर बहिष्कार टाकून आपली नाराजी व्यक्त केली.

बैठकीनंतर सर्व मंत्र्यांनी मुख्यमंत्री देवेंद्र फडणवीस यांची भेट घेतली. यात भाजपमधील त्यात आज कल्याण-डोंबिवलीमधील इनकमिंगविरोधात तक्रार केली. यावर मुख्यमंत्र्यांनी सर्व मंत्र्यांना उल्ल्हासनगरमधील पक्षप्रवेशाचे उदाहरण देत झापले. "तुम्ही उल्ल्हासनगरमधून सुरुवात केली. तुम्ही केले ते चालते, असे चालणार नाही, असे म्हणत मंत्र्यांना सुनावले. त्यानंतर फडणवीसांनी संताप आवरत यापुढे एकमेकांना प्रवेश देऊ नका, दोन्ही पक्षांनी या गोष्टी पाळाव्यात अशा सूचना दिल्या.

कल्याण-डोंबिवलीमध्ये शिवसेनेला खिंडार :

महापालिका निवडणुकीच्या तोंडावर कल्याण-डोंबिवलीमध्ये खिंडार पडत आहेत. पंचवीस वर्ष नगरसेवक राहिलेले दिवंगत वामन म्हत्रे यांचे सुपुत्र अनमोल म्हात्रे यांनी शिवसेनेला सोडचिठ्ठी दिल्यानंतर काही तासांतच तीन नगरसेवकांनी आपल्या समर्थकांसह भाजप प्रदेशाध्यक्ष रवींद्र चव्हाण यांच्या उपस्थितीत भाजपमध्ये प्रवेश केला आहे. माजी नगरसेविका डॉ. सुनीता पाटील, माजी नगरसेवक महेश पाटील, माजी नगरसेविका सायली विचारे यांनी पदाधिकाऱ्यांसह भाजपात प्रवेश केला.