Rajmata Jijau Birth Anniversary: जिजाऊंचा जन्मोत्सव चार दिवसांवर; तरीही नियोजनाकडे दोन्ही पालकमंत्र्यांचे दुर्लक्ष, मराठा क्रांती मोर्चा आक्रमक

Buldhana News: राजमाता जिजाऊंच जन्मस्थान असलेल्या सिंदखेडराजा येथे दरवर्षी 12 जानेवारीला जिजाऊंचा जन्मोत्सव साजरा करण्यात येतो. हा जन्मोत्सव आता चार दिवसांवर येऊन ठेपला आहे. नियोजनाकडे दोन्ही पालकमंत्र्यांनी दुर्लक्ष केल्याचा आरोप मराठा क्रांती मोर्चाने केला आहे.

जिल्ह्याचे पालकमंत्री मकरंद पाटील यांनी या ठिकाणी एकही आढावा बैठक घेतली नाही. सिंदखेड राजा येथे जिजाऊ भक्तांसाठी कुठल्याही सोयी सुविधा पुरविण्यात आल्या नसल्याचा आरोप मराठा क्रांती मोर्चा चे राज्य समन्वयक महेश भैय्या डोंगरे यांनी केला आहे.

बुलढाणा जिल्ह्याला दोन पालकमंत्री देण्यात आले आहेत. जिजाऊ जन्मोत्सव सोहळ्याला देशभरातून लाखो भाविक हे सिंदखेडराजा येथे येत असतात मात्र त्यांच्यासाठी कुठल्याही सोयी सुविधा न पुरवता व कुठलीही आढावा बैठक न घेतल्याने आता मराठा क्रांती मोर्चा आक्रमक झाला आहे. त्यांनी मोठ्या आंदोलनाचा इशारा दिला आहे.

येत्या 12 जानेवारीला सिंदखेड राजा येथे राजमाता जिजाऊंचा जन्मोत्सव साजरा करण्यात येणार आहे. त्यासाठी देशभरातून लाखो भाविक येतात मात्र अद्यापही भाविकांसाठी कुठल्याही सोयी सुविधा पुरविण्यात आलेल्या नाहीत.

समृद्धी महामार्ग लगत राजमाता जिजाऊंचा बाल शिवबासह पुतळा उभा करण्याचा निर्णय सरकारने घेतला होता, मात्र अद्यापही तो पुतळा उभा न राहिल्याने मराठी क्रांती मोर्चा ने सरकारचा निषेध केला आहे. बुलढाण्याचे सहपालकमंत्री संजय सावकारे आहेत.