Sharad Pawar News: निवडणुकीच्या धामधुमीत शरद पवार यांच्या माजी आमदाराला ह्दयविकाराचा झटका

ऐन निवडणुकीच्या धामधुमीत राष्ट्रवादी काँग्रेस शरदचंद्र पवार पक्षाचे माजी आमदाराला ह्दयविकाराचा झटका आला आहे. त्यांना तातडीने रुग्णालयात दाखल करण्यात आले आहे. आता त्यांची प्रकृती स्थिर असल्याची माहिती त्यांचे सुपुत्र राष्ट्रवादी काँग्रेस शरदचंद्र पवार पक्षाचे अकोला जिल्हाध्यक्ष संग्राम गावंडे यांनी दिली आहे.

राज्याचे माजी क्रीडा राज्यमंत्री तथा शरद पवारांच्या राष्ट्रवादी काँग्रेसचे ज्येष्ठ नेते,माजी आमदार गुलाबराव गावंडे (Gulabrao Gawande) यांना गेल्या दोन-तीन दिवसापासून अस्वस्थ वाटत होते. त्यांना तातडीने अकोला येथील एका खासगी रुग्णालयात उपचारासाठी दाखल करण्यात आले होते. त्यानंतर डॉक्टरांच्या सल्लानुसार त्यांना नागपूरच्या रुग्णालयात हलविण्यात आले. येथे त्यांच्यावर शस्त्रक्रिया करण्यात आली.

विदर्भातील वजनदार नेता म्हणून गुलाबराव गावंडे यांची ओळख आहे. ते अकोला येथील कौलखेड भागातील रहिवासी आहेत. शरद पवार यांच्या राष्ट्रवादी काँग्रेसमधील माजी आमदार आहेत. सुरवातीच्या काळात ते शिवसैनिक होते. शिवसेना-युतीच्या काळात मनोहर जोशी मुख्यमंत्री असताना गावडे हेविविध चार खात्याचे राज्यमंत्री होते.

अकोला पश्चिम मतदारसंघातून 2014च्या विधानसभा निवडणुकीत त्यांना पराभवाचा सामना करावा लागला. त्यानंतर गुलाबरावांनी शिवसेनेला 'जय महाराष्ट्र'करुन राष्ट्रवादी काँग्रेसमध्ये प्रवेश केला होता. विदर्भातील आक्रमक नेता अशी ओळख असलेले गुलाबराव हे तीन वेळा वेगवेगळ्या मतदारसंघातून आमदार म्हणून निवडून आले आहेत.

शेतकऱ्यांच्या प्रश्नावर विधानसभेत त्यांना प्रश्न मांडू न दिल्याने सभागृहात अंगावर रॉकेल टाकल्याने त्यावेळी ते चर्चेत आले होते. वाशिम जिल्ह्यातील कारंजा मतदारसंघातून 1990 मध्ये, त्यानंतर 1995 मध्ये अकोला जिल्ह्यातील बोरगावमंजू अर्थातच आताचा अकोला पुर्व मतदारसंघ, आणि 2004 मध्ये अकोला जिल्ह्यातील अकोट मतदारसंघातून ते आमदार झाले आहेत.