"गोपीनाथ मुंडेंमुळे डाटा जमा झाल्याचे सांगतात, पण आता?", भुजबळांचा हल्लाबोल

भंडारा : भाजप नेत्या पंकजा मुंडे यांनी ट्विट करत महाविकास आघाडी सरकारचे मंत्री हतबल झाले अशी टीका केली होती. त्याला प्रतिउत्तर देताना अन्न पुरवठा मंत्री छगन भुजबळ (Chhagan Bhujabal) यांनी पंकजा मुंडे (Pankaja Munde) यांच्यावर निशाणा साधला. ते म्हणाले, मी पंकजा मुंडे यांना एक प्रश्न विचारतो की, गोपीनाथ मुंडे (Gopinath Munde) यांनी लोकसभेत नेमकी कोणती मागणी केली? ओबीसी डाटा (Obc reservation) जमा करण्याची केली होती ना?

अलिकडे देखील अनेक भाषणात पंकजा मुंडेंनी सांगितले आहे की, ओबीसींची जनगणना झाली, डाटा जमा झाला तो गोपीनाथ मुंडे यांच्यामुळेच झाला. पण आता त्याच महाविकास आघाडी सरकारवर का निशाणा साधत आहेत? असा प्रश्न भुजबळ यांनी उपस्थित केला.

छगन भुजबळ भंडाऱ्यात बोलत होते. भंडारा-गोंदिया जिल्हा परिषद व पंचायत समितीच्या निवडणूक प्रचाराची रणधुमाळी सुरू असल्याने भुजबळ भंडारा जिल्ह्यात प्रचारासाठी आले होते. त्यावेळी पत्रकारांशी बोलताना त्यांनी सांगितले की ओबीसी समाजावर अन्याय हा भाजपा करत आहे. ओबीसी आरक्षणाशिवाय निवडणूकांचा परिणाम भाजपला भोगावा लागेल, कारण भाजपने ओबीसी समाजाला फसवले आहे, खोटे बोललेले आहेत. असलेला डाटा द्यायला त्यांनी नकार दिला. त्यामुळे भाजपला याचा परिणाम भोगावा लागेल, असेही ते म्हणाले.

काही ओबीसी संघटनांनी निवडणूकांवर बहिष्कार घालण्याची भूमिका घेतली आहे. त्यावर बोलताना भुजबळ म्हणाले, निवडणूका व्हायच्या असतील होतील, पण यात जर निवडणूकांवेळी घरात बसले तर त्याचा फायदा ज्यांनी डाटा लपवला त्यांच्यावर होईल. त्यामुळे असे करु नका. ओबीसी समाजानी मतदानावर बहिष्कार करून पुन्हा भाजपाला संधी देण्यापेक्षा घराबाहेर या आणि भाजपला या निवडणूकीतून बाहेर फेका, असेही आवाहन भुजबळ यांनी केली.

ओबीसींचे भविष्य म्हणजे आता काही ठिकाणी आम्ही प्रतिनिधीत्व मिळणार नाही हे खरे आहे. पण न्यायालयाने आरक्षण नाकारले नाही. फरक आहे. आम्ही लवकरात लवकर तीन टेस्ट करुन न्यायालयातून पुन्हा आरक्षण आणू, असेही भुजबळ यांनी सांगितले.