Girish Mahajan Vs. Eknath Khadse : 'पीआय'च्या मृत्यू प्रकरणावरुन विधानपरिषदेत गिरीश महाजन अन् खडसेंमध्ये खडाजंगी

Nagpur News : नागपुरातील हिवाळी अधिवेशनाचा शुक्रवारी पाचवा दिवस आहे. राज्यात सध्या राजकीय घडामोडींना वेग आला आहे. त्यातच विधिमंडळात सत्ताधारी व विरोधकांकडून एकमेकांवर आरोप-प्रत्यारोप केले जात असल्याने वातावरण चांगलेच तापले आहे. विधानपरिषदेतील चर्चेवेळी मंत्री गिरीश महाजन विरुद्ध एकनाथ खडसे अशी खडाजंगी पाहायला मिळाली. दोन्ही नेत्यांनी एकमेकांवर जोरदार आरोप-प्रत्यारोप केले. (Girish Mahajan Vs. Eknath Khadse News)

विधानपरिषदेत गिरीश महाजन (Girish Mahajan) यांनी एकनाथ खडसे यांच्यावर केलेल्या आरोपामुळे वातावरण चांगलेच तापले होते. निर्देश करत सदरे नावाच्या पीआयने आत्महत्या कुणामुळे केली हे स्पष्ट करण्याची मागणी केली. तर वाळू माफिया, अवैध उत्खनन केल्याचा खडसेंवर गंभीर आरोप केला. यामुळेच कुटुंबातील लोकांना 3 वर्ष जेलमध्ये राहावे लागल्याचा आरोप गिरीश महाजन यांनी केला. तर खडसेंकडून देखील जळगाव जिल्ह्यात वाळू उपसा आणि अवैध धंदे महाजन यांच्या आशीर्वादाने सुरू असल्याचा आरोप केला.

कायदा सुव्यवस्थेचा प्रश्न निर्माण झाला

जळगाव जिल्ह्यात गोळीबाराच्या घटना वाढत आहेत. ग्रामीण भागात देखील घटना घडत आहेत. दिवसाढवळ्या खून होत आहेत, याची देखील चौकशी झाली पाहिजे असेही खडसे म्हणाले. या गुन्ह्यातील आरोपी पकडले जात नाहीत, हे गंभीर असल्याचे खडसे म्हणाले. वाळूमाफियांनी अधिकाऱ्यांना मारहाण केली आहे. वारंवार असे प्रकार जळगाव जिल्ह्यात घडत असल्याचे खडसे म्हणाले. अधिकाऱ्यांच्या अंगावर गाडी घालण्याचे प्रकार होत आहेत. कायदा सुव्यवस्थेचा प्रश्न निर्माण झाल्याचे खडसे (Eknath Khadse) म्हणाले.

... तर चौकशी करा

राज्यात कोणाचे सरकार आहे, ते सर्वाना माहित आहे. वाळू माफिया संदर्भात तुम्ही बांगड्या घातल्यात का? असे खडसे म्हणाले. कापसाला तुम्ही का दर देत नाहीत? मी माझे मुद्दे मांडत आहे, कोणाला राग येण्याची गरज नाही असे खडसे म्हणाले. नुसते आरोप करायचे, खोटे गुन्हे दाखल करायचे काम सुरु असल्याचे खडसे म्हणाले. वाळू माफिया संदर्भात माझा काही संबंध असेल तर चौकशी करा असेही खडसे म्हणाले.