Eknath Shinde : काही तरी शिजतंय? मोदी-शहांच्या भेटीनंतर एकनाथ शिंदेनी स्पष्ट केली भूमिका

Eknath Shinde News : मंत्रिमंडळातील खाते वाटपाच्या नंतर पहिल्यांदाच उपमुख्यमंत्री एकनाथ शिंदे यांनी दिल्लीत पंतप्रधान नरेंद्र मोदी, गृहमंत्री अमित शाह, भाजपचे अध्यक्ष जेपी नड्डा यांची भेट घेतली. एकनाथ शिंदें यांनी भाजपच्या तीनही वरिष्ठ नेत्यांची भेट घेतल्याने राजकीय चर्चांना उधाण आले होते. मात्र, खुद्द शिंदे यांनी या भेटी मागचे कारण स्पष्ट करत चर्चांना पूर्णविराम दिला आहे.

उपमुख्यमंत्री शिंदे म्हणाले, पंतप्रधान मोदी, गृहमंत्री अमित शाह आणि जेपी नड्डा यांची घेतलेली भेट ही सदिच्छा भेट होती. मी, उपमुख्यमंत्री अजित पवार आणि मुख्यमंत्री देवेंद्र फडणवीस पुन्हा दिल्लीत येऊन नेत्यांची भेट घेणार असल्याचेही शिंदे यांनी स्पष्ट केले.

लोकसभेत सरकारपुढे महत्त्वाची विधेयके आहेत. पंतप्रधान नरेंद्र मोदी यांनी एक देश एक निवडणूक या विधेयकाला महत्त्व दिले आहे. एक देश एक निवडणूक विषयी बोलताना एकनाथ शिंदे म्हणाले, देशाची प्रगती होण्यासाठी वन नेशन वन इलेक्शन गरजेचे आहे. सतत होणाऱ्या निवडणूकांमुळे विकास थांबला जातो.

पुत्र,स्नुषाही सोबत

पंतप्रधान मोदी, गृहमंत्री अमित शाह, जेपी नड्डा यांची भेट घेत असताना त्यांच्यासोबत पुत्र खासदार श्रीकांत शिंदे आणि स्नुषा वृषाली शिंदे हे देखील उपस्थित होते. जेपी नड्डा यांच्यासोबत झालेल्या भेटीचा फोटो ट्विट करत शिंदे यांनी राष्ट्रीय लोकशाही आघाडीतील महत्त्वाचा साथीदार असलेल्या शिवसेनेला राज्यातील निवडणुकामध्ये मिळालेल्या यशाबद्दल नड्डा यांनी अभिनंदन केले. तसेच आरोग्य क्षेत्रातील विविध विषयांबाबत त्यांच्याशी चर्चा झाली, असे सांगितले.

शाह, नड्डांनी दिली खास भेट

भेटीदरम्यान उपमुख्यमंत्री शिंदे यांनी पंतप्रधान मोदी यांना पारंपरिक शाल देत सन्मान केला.तर, जेपी नड्डा यांच्या भेटी दरम्यान त्यांना प्रभू श्रीरामाची मूर्ती भेट दिली. तर, गृहमंत्री अमित शाह यांना पारंपरिक शाल आणि छत्रपती शिवाजी महाराज यांची मूर्ती भेट दिली.