Devendra Fadnavis Video : शेतकरी अडचणीत! कर्जमाफीविषयी देवेंद्र फडणवीस स्पष्टच म्हणाले, 'वारंवार करता येत...'

Devendra Fadnavis News : अतिवृष्टीमुळे शेतकीर अडचणीत सापडला आहे. मराठवाडा आणि सोलापूर जिल्ह्यात सर्वाधिक फटका शेतकऱ्यांना बसला आहे. महाराष्ट्रभर पावसाचे थैमान सुरू आहे. त्यामुळे राज्यातील शेतकरी अडचणीत आले आहेत. त्यामुळे महायुती सरकारने विधानसभा निवडणुकीत केलेल्या कर्जमाफीच्या घोषणेची अंमलबजावणी करण्याची मागणी होत आहे. त्याविषयी मुख्यमंत्री देवेंद्र फडणवीस यांनी आपली भूमिका स्पष्ट केली आहे.

मुख्यमंत्री फडणवीस दिल्ली दौऱ्यावर असताना त्यांनी पंतप्रधान नरेंद्र मोदींची भेट घेत राज्याचे अतिवृष्टीने झालेल्या नुकसानाची माहिती दिली. माध्यमांशी संवाद साधताना कर्जमाफीच्या मागणीविषयी फडणवीस यांना पत्रकारांनी विचारले असता ते म्हणाले, 'कर्जमाफी संदर्भात आम्ही घोषणापत्रात आश्वासन दिले आहे, त्याची पूर्तता करणार आहोत. मात्र, ती कधी व कशी करायची हे आमची समिती अभ्यास करत आहे.'

पुढे बोलताना त्यांनी स्पष्ट केले की, 'कर्जमाफी वारंवार करता येत नाही. त्यामुळे ती करताना परिमाणकारक होणे आवश्यक आहे. सध्या काय महत्त्वाचे आहे तर शेतकऱ्यांच्या खात्यात थेट पैसे पोहोचवणे. ते आमचे कर्तव्य आहे. खरीपासाठी घेतलेल्या कर्जाची परतफेड शेतकऱ्यांना पुढील वर्षी करावी लागणार आहे.'

25 हजार 477 कोटींची थकबाकी

शेतकऱ्यांना बँकाचे कर्ज मिळण्यासाठी पूर्वीची थकबाकी भरलेली असणे गरजेचे आहे. मात्र, शेतकऱ्यांची तब्बस 25 हजार 477 कोटींची थकबाकी असल्याचे समोर आले आहेत. या थकबाकीमुळे तब्बल 25 लाख शेतकऱ्यांना बँकेकडून कर्ज मिळण्याचे दरवाजे बंद झाले आहेत. त्यामुळे सरकारने तातडीने कर्जमाफी करून शेतकऱ्यांना दिलासा दावा, अशी मागणी करण्यात येत आहे.

हिवाळी अधिवेशनात ठोस निर्णय

मुख्यमंत्री फडणवीस यांनी कर्जमाफी विषयी बोलताना स्पष्ट केले की, कर्जमाफी एकदाच केली झाले ती वारंवार केली जात नाही. त्यामुळे परिणामकारक होणे आवश्यक आहे. त्यामुळे सरकार लगेच कर्जमाफी करण्याच्या तयारी दिसत नाही. मात्र, हिवाळी अधिवेशनाच्या दरम्यान कर्जमाफीबाबत ठोस निर्णय होण्याची शक्यता आहे.