Ladki Bahin Yojana : लाडक्या बहिणींसाठी 'गूड न्यूज'; फेब्रुवारीचा हफ्ता जमा व्हायला सुरुवात, आदिती तटकरेंची मोठी घोषणा!

Ladki Bahin scheme beneficiary payment: राज्यातील महिलांसाठी आनंदाची बातमी समोर आली आहे. सरकारच्या ‘मुख्यमंत्री माझी लाडकी बहीण’ योजनेअंतर्गत फेब्रुवारी महिन्याचा हप्ता अखेर वितरित होण्यास सुरुवात झाली आहे. महिला आणि बालविकास मंत्री आदिती तटकरे यांनी याबाबत अधिकृत माहिती दिल्यामुळे राज्यभरातील लाभार्थी महिलांमध्ये समाधानाचे वातावरण आहे.

या योजनेअंतर्गत पात्र महिलांना दरमहा 1500 रुपये सन्मान निधी म्हणून दिले जातात. फेब्रुवारी महिन्याचा हप्ता जमा करण्याची तांत्रिक प्रक्रिया सुरू झाली असून पुढील 2 ते 3 दिवसांत हा निधी थेट आधार संलग्न बँक खात्यात जमा होणार असल्याची माहिती देण्यात आली आहे. त्यामुळे अनेक महिलांनी आपल्या खात्याची पडताळणी सुरू केली आहे.

आदिती तटकरे यांनी सोशल मीडियावर पोस्ट करत या प्रक्रियेची सुरुवात झाल्याचे स्पष्ट केले. त्यांनी सांगितले की, राज्यातील सर्व पात्र लाभार्थ्यांना वेळेत निधी मिळावा यासाठी शासनाकडून आवश्यक ती तयारी पूर्ण करण्यात आली आहे. या योजनेमुळे महिलांना आर्थिक आधार मिळत असून त्यांच्या दैनंदिन गरजा भागविण्यास मदत होत आहे.

राज्य सरकारने या योजनेला सातत्याने चालना देण्याचा निर्धार व्यक्त केला आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्राकाकी पवार यांच्या मार्गदर्शनाखाली ही योजना पुढेही प्रभावीपणे राबवली जाणार असल्याचे सांगण्यात आले आहे. महिलांचा वाढता प्रतिसाद आणि विश्वास लक्षात घेता ही योजना अधिक मजबूत करण्यावर भर दिला जात आहे.

दरम्यान, या योजनेचा लाभ सुरू ठेवण्यासाठी ई-केवायसी प्रक्रिया पूर्ण करणे अत्यंत आवश्यक आहे. पात्रतेनुसार कुटुंबाचे वार्षिक उत्पन्न 2.5 लाखांपेक्षा कमी असणे गरजेचे आहे. काही महिलांनी ई-केवायसी करताना चुकीची माहिती भरल्याचे लक्षात आल्याने दुरुस्ती करण्यासाठी 31 मार्च 2026 पर्यंत मुदत देण्यात आली होती.