Maratha-Kunbi Certificates : मनोज जरांगेंच्या दाव्यातील सरकारने हवाच काढली; वैध मराठा-कुणबी प्रमाणपत्रांची आकडेवारीच दाखवली, मराठवाड्यातही तब्बल 20 हजार....

Manoj Jarange News: मनोज जरांगे पाटील यांनी सरकारवर गंभीर आरोप करत मराठ्यांना मिळालेली कुणबी प्रमाणपत्र जाणीवपूर्वक रद्द केली जात असल्याचा आरोप केला आहे. जात पडताळणी समितीकडून तीन जिल्हा परिषद, पंचायत समिती सदस्यांची जात प्रमाणपत्र रद्द केली होती. त्यावरून जरांगे पाटलांनी महसूल मंत्री चंद्रशेखर बावनकुळे आणि मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्यावर टीका केली. त्यांनी सरकारला थेट आंदोलनाचा इशारा दिला आहे.

जरांगे पाटील यांनी केलेल्या आरोपानंतर सरकारकडून मराठा-कुणबी आणि कुणबी-मराठा जात प्रमाणपत्र वैधतेसाठी किती अर्ज आले आणि किती अवैध ठरवण्यात आले याची आकडेवारीच जाहीर केली आहे. जात वैधता प्रमाणपत्र अवैध ठरण्याचे प्रमाण अवघे 0.30 टक्के आहे.

ऑक्टोबर 2023 ते 31 जुलै 2026 या कालावधीत राज्यातील जात पडताळणी समितीकडे 2 लाख 96 हजार 246 अर्ज आले. त्यापैकी तब्बल 2 लाख 59 हजार 844 प्रमाणपत्र वैध ठरण्यात आली. तर, केवळ 219 अर्ज नामंजूर करण्यात आले आहेत. तसेच 10 हजार 843 अर्जांवर निर्णय झालेला नाही. ती अर्ज प्रलंबित आहेत. ही आकडेवारी संपूर्ण राज्यभरातील आहेत.

मराठवाड्यात काय स्थिती?

मनोज जरांगे पाटील यांच्या आंदोलनाने सर्व मराठ्यांना कुणबी प्रमाणपत्र मिळेल,असे सांगितले जात होते. हैद्राबाद गॅझेटच्या नोंदींना मान्यता देण्याच्या निर्णयानंतर मराठा कार्यकर्त्यांना गुलाल उधळून आनंद देखील साजरा केला होता. मराठवाड्यात 20 हजार 143 हजार जात प्रमाणपत्र पडताळणी समिती समोर आले होते. त्यातील 15 हजार 597 प्रमाणपत्र वैध ठरवण्यात आली आहेत. केवळ 61 अर्ज नामंजुर करण्यात आले आहेत. शिवाय 1957 अर्जांवर निर्णय प्रलंबित असून २५२८ अर्ज अपुरी कागदपत्रे आणि अन्य कारणाने निकाली काढण्यात आले आहेत.

सरकार मराठा समाजाच्या पाठीशी

मनोज जरांगे पाटील यांनी केलेल्या टीकेवर बोलताना महसूलमंत्री चंद्रकांत बावनकुळे म्हणाले, कालही सांगितलं, परवाही सांगितलं अन् आजही सांगतो महाराष्ट्र सरकार पूर्णपणे मराठा समाजाच्या बाजूने आहे. मराठा समाजाला न्याय देताना ओबीसी समाजाला न्याय मिळेल तर ओबीसी समाजाला न्याय देताना मराठा समाजालाही न्याय मिळेल याकडे आमचे लक्ष आहे.