Gram Panchayat Fund: ग्रामपंचायतीला किती निधी आला, कुठे खर्च झाला? आता मोबाईलवरच पाहता येणार सगळा हिशेब

e-GramSwaraj News : गावातील ग्रामपंचायतीला किती निधी मिळाला, तो कोणत्या योजनेतून आला आणि त्याचा नेमका वापर कुठे झाला, याची माहिती जाणून घेण्यासाठी आता नागरिकांना ग्रामपंचायत कार्यालयाच्या फेऱ्या मारण्याची गरज राहणार नाही.

शासनाने उपलब्ध करून दिलेल्या ‘ई-ग्रामस्वराज’ पोर्टल आणि मोबाइल अॅपच्या माध्यमातून ग्रामपंचायतीच्या आर्थिक तसेच प्रशासकीय कामकाजाची माहिती थेट नागरिकांना पाहता येणार आहे.

या डिजिटल व्यवस्थेमुळे ग्रामपंचायतीच्या कारभारात पारदर्शकता वाढण्यास मदत होणार आहे. केंद्र आणि राज्य शासनाकडून मिळणारा निधी, विविध योजनांमधून आलेली रक्कम आणि त्या निधीतून झालेला खर्च याचा तपशील पोर्टलवर उपलब्ध होतो. त्यामुळे गावातील विकासकामांसाठी आलेला पैसा नेमका कुठे खर्च झाला, याचा मागोवा घेणे नागरिकांना शक्य होणार आहे.

निधी आणि खर्चाचा तपशील एका क्लिकवर

ग्रामपंचायतीला विविध विकासकामांसाठी मिळालेला निधी कोणत्या योजनेतून प्राप्त झाला, त्यापैकी किती रक्कम खर्च झाली आणि किती निधी शिल्लक आहे, याची माहिती ई-ग्रामस्वराज पोर्टलवर पाहता येते. त्यामुळे निधीच्या वापराबाबत अधिक स्पष्टता निर्माण होणार आहे.

विशेष म्हणजे, ग्रामपंचायतीच्या आर्थिक व्यवहारांशी संबंधित माहिती एकाच डिजिटल माध्यमावर उपलब्ध असल्याने कारभारातील पारदर्शकता वाढण्याची अपेक्षा आहे. निधीचा वापर आणि खर्च याबाबत नागरिकांना थेट माहिती मिळू शकणार आहे.

गावातील विकासकामांचीही मिळणार माहिती

गावात सध्या कोणती विकासकामे सुरू आहेत, कोणती कामे मंजूर झाली आहेत, तसेच संबंधित कामांचा तपशील काय आहे, याची माहितीही नागरिकांना पाहता येणार आहे. कामासाठी मंजूर निधी, त्याची प्रगती आणि संबंधित कंत्राटदार किंवा यंत्रणेशी निगडित माहिती उपलब्ध होण्यामुळे विकासकामांवर लक्ष ठेवणे सोपे होणार आहे.

‘ई-ग्रामस्वराज’ पोर्टलवर ग्रामपंचायतीचे प्रोफाइल, निवडून आलेले प्रतिनिधी आणि पंचायत सदस्यांची माहितीही उपलब्ध असते. त्याचबरोबर ग्रामपंचायतीच्या कामकाजाची माहिती आणि विविध विकासकामांची प्रगती दर्शविणारे अहवालही पाहता येतात.

सामान्य नागरिकांनाही थेट अॅक्सेस

स्मार्टफोनच्या माध्यमातून नागरिकांना ग्रामपंचायतीशी संबंधित माहिती घरबसल्या तपासता येणार आहे. विशेष म्हणजे, यासाठी कोणत्याही कार्यालयात जाऊन चौकशी करण्याची आवश्यकता नाही. डिजिटल माध्यमातून उपलब्ध असलेल्या माहितीमुळे ग्रामपंचायतीच्या कारभारावर नागरिकांची नजर राहण्यास मदत होणार आहे.

यामुळे ग्रामपंचायतीच्या कामकाजातील गोपनीयता कमी होऊन पारदर्शकता आणि उत्तरदायित्व वाढण्यास हातभार लागणार आहे. गावातील विकासकामे, निधीचा वापर आणि प्रशासनाशी संबंधित माहिती नागरिकांपर्यंत थेट पोहोचवण्याच्या दृष्टीने ही डिजिटल व्यवस्था महत्त्वाची ठरणार आहे.