Ambadas Danve : मोठी बातमी! विधानपरिषद उपसभापती पदासाठी मविआचा उमेदवार ठरला; अंबादास दानवेंनी जाहीर केले नाव

महाविकास आघाडीने विधान परिषद उपसभापती पदाच्या निवडणुकीसाठी मोठा राजकीय निर्णय घेतला आहे. संख्याबळ कमी असल्याची जाणीव असूनही आघाडीने निवडणुकीच्या मैदानात उतरण्याचा निर्धार केला आहे. यासाठी मुंबई शिक्षक मतदारसंघाचे आमदार आणि शिक्षण क्षेत्रातील ज्येष्ठ अभ्यासक जग्गनाथ मोतीराम अभ्यंकर (जमू अभ्यंकर) यांना उमेदवारी देण्यात आली आहे. शिवसेना नेते अंबादास दानवे यांनी ही घोषणा करत त्यांच्या उमेदवारीचा अर्ज आज दाखल केला जाणार असल्याची माहिती दिली.

उद्या होणाऱ्या निवडणुकीकडे राज्याच्या राजकीय वर्तुळाचे लक्ष लागले आहे. महाविकास आघाडीची संख्या तुलनेने कमी असली तरी लोकशाही प्रक्रियेत सहभाग घेणे महत्त्वाचे असल्याचे दानवे यांनी स्पष्ट केले. आघाडीकडे सध्या केवळ 14 ते 15 सदस्यांचे पाठबळ असल्याचे त्यांनी मान्य केले, मात्र निवडणूक लढवणे ही लोकशाहीची गरज असल्यामुळे उमेदवार उभा केला जात असल्याचे त्यांनी सांगितले.

जमू अभ्यंकर हे शिक्षण क्षेत्रातील अनुभवी आणि अभ्यासू व्यक्तिमत्त्व म्हणून ओळखले जातात. शिक्षक आणि विद्यार्थ्यांच्या प्रश्नांवर त्यांनी सातत्याने काम केले असून त्यांच्या अनुभवाचा विचार करूनच महाविकास आघाडीने त्यांच्यावर विश्वास दाखवला आहे.

यावेळी राष्ट्रवादी काँग्रेसमधील राजकीय घडामोडींवरही दानवे यांनी भाष्य केले. शरद पवार यांचे नेतृत्व मोठे असून भविष्यातील राजकीय समीकरणांबाबत आत्ताच अंदाज बांधणे योग्य ठरणार नाही, असे ते म्हणाले. लोकसभा आणि विधानसभा निवडणुकांमध्ये आघाडीतील पक्ष एकत्र असल्याचेही त्यांनी नमूद केले.