Balasaheb Thackeray : बाळासाहेबांचा महिलांना सल्ला होता, पर्समध्ये 'मिरची पूड' अन् 'रामपुरी चाकू' ठेवा; मंत्री पाटलांनी सांगितली आठवण

Maharashtra Politics : राज्यात महिलांविरोधात वाढलेल्या अत्याचारांच्या घटनांवर विरोधकांसह सत्ताधारी देखील आक्रमक आहे. पण, कुठे ना कुठे प्रवृत्ती महिलांवर अन्याय, अत्याचार करतेच. यातून संपूर्ण समाजात पडसाद उमटतात.

पीडिताला यातून सामाजिक मानसिक त्रासाला मोठ्याप्रमाणात त्रासाला समोरे जावे लागते. आज जागतिक महिला दिनानिमित्ताने जळगावचे पालकमंत्री गुलाबराव पाटील यांनी शिवसेनाप्रमुख बाळासाहेब ठाकरे यांनी महिलांना आत्म संरक्षणासाठी दिलेल्या सल्ल्याची आठवण करून सांगितली.

जळगाव महापालिकेत महिला दिनानिमित्ताने कार्यक्रम झाला. पालकमंत्री गुलाबराव पाटील (Gulabrao Patil) कार्यक्रमाला प्रमुख म्हणून उपस्थित होते. शिवसेनाप्रमुख तथा हिंदूहृयस्रमाट बाळासाहेब ठाकरे महिलांना आत्म संरक्षणाचा कोणता सल्ला द्यायचे, याची मंत्री पाटील यांनी आठवण सांगताच सभागृह स्तब्ध अन् एकदम शांत झाला.

गुलाबराव पाटील म्हणाले, "बाळासाहेब ठाकरे (Balasaheb Thackeray) म्हणायचे की, महिलांनी पर्समध्ये लिपस्टिकसह 'मिरची पूड' आणि 'रामपुरी चाकू' ठेवला पाहिजे. परंतु आताच्या घाण घाण घटना, जर बघितल्या तर महिलांनी आत्म संरक्षणासाठी सज्ज राहिलं पाहिजे".

'महिला सुरक्षेसाठी सरकार कटिबद्ध असून, महिलांनी देखील आत्म संरक्षणासाठी सज्ज राहावे. महिला सुरक्षेसाठी एसटी महामंडळ विशेष हेल्पलाइन क्रमांक सुरू करणार असून, आरोग्य सेवा मोफत मिळावी, यासाठी जिल्ह्यात विशेष उपक्रम राबवले जातील, असे मंत्री पाटील यांनी सांगितले.

महिला बचत गटांना प्रोत्साहन देण्यासाठी महापालिकेच्या सहकार्याने मॉल उपलब्ध करून देण्याचे प्रयत्न आहे. महिला सशक्तीकरण आणि सुरक्षेसाठी राज्य सरकार कटिबद्ध असून, भविष्यात महिलांसाठी अधिक सुविधा आणि योजनांची अंमलबजावणी करण्यात येईल, असेही पालकमंत्री पाटील यांनी स्पष्ट केले.